Veelderhande liedekens, gemaect uut den Ouden ende Nieuwen Testamente

[Periculoose tijden]

C Na de wijse: Hoort vrienden altesamen.

^‡PEriculoose tijden
Sijnt nu aen allen zijden
Sheeren dach, na tbelijden
Is na by int verschijnen
^*Want vechten ende strijden
Sietmen sonder vermijden
Tkint den Vader benijden
Deen vrient den anderen pijnen
^†De liefde triumphant
Wert cout in elcken cant
^‡En boosheyt abundant
Hout nu de ouerhant
Veel valsche Propheten
Met Mammons gheest beseten
Schijnheylich int vermeten
Verleyden tvolc, met een geueynst samblant.

Veel gheueynsde ypocrijten

^*Gaen wel in Schaeps habijten
Maer vol nijdich verwijten
So zijnt Woluen bloetgierich
Soeckende eyghen profijten
Ghelijck Mammons subdijten
Die haerlier tijt verslijten
Na tvleeschs wellusten vierich
^†En in een schijnsel vranck
Van ghebedekens lanck
^‡Leyden de vroukens cranck
Gheuanghen met bedwanck
Op etende inwendich
De huysen (seer behendich)
Der weduwen ellendich

‡ 2. Ti. 3, 1.

* 4. es. 13, 31
mat. 24, 7
Luc. 21, 8.

† mat. 24, 12

‡ 4. esd. 5, 2 ende 14, 16. ende 15, 6.

* Mat. 7, 15

† mat. 23, 13.
mar. 12, 40
luc. 20, 46

‡ 1. Ti. 3, 6

[fol. 291v]

 

Wacht v van sulcke, want ter doot loopt haer ganck.

 

Nae Daniels verclaren

 

Seer by int openbaren

 

Is tgrouwelijck beswaren

 

Der verwoesting ertuerlijck

 

Onchristelijcke scharen

 

Als Babilons dienaren

 

Tcleyn Hoopken niet en sparen

 

Maer veruolgent gheduerlijck

 

Ghehuerde Leeraers coen

 

Valsch van opinioen

 

Door Sathanas beuroen

 

^*Teeckens, en wonder doen

 

So dat de wtghelesen

 

Waert mogelijck in desen

 

Oock verleyt souden wesen

 

Hierom siet toe, wilt v om waken spoen.

 

^† Waect, bidt, tot allen stonden

 

Dat ghy verhert in sonden

 

Niet en valt nae tvermonden

 

Int becorens beswaren

 

Want vele boose gronden

 

Sijn ter werelt beuonden

 

^‡Wachters blent, stomme honden

 

Egipsche toouenaren

 

^*Dienaren Baals fel

 

^†Propheten Jesabel

 

Sielen moorders niet el

 

Tvolck brengende int ghequel

 

Verwoesters, vol oneeren

 

Vanden wijnberch des Heeren

 

Die Tlant schandaliseren

 

^‡Scheyt v van sulcke, na des Heeren beuel.

 

^* Wilt v van sulcke scheyden

 

Want tzijn der goeder weyden

 

Vertreders, die verleyden

 

Donnoosel Schaepkens deerlijck

 

Voedende op drooghe heyden

 

Met deesemich verbreyden

* mat. 24, 24
2. Tess. 2, 9

† mat. 24, 42 ende 26, 40.

‡ Esa. 56, 10

* 3. re. 18, 26

† 3. reg. 18, 19.

‡ 2. cor. 6, 17
Apo. 18, 4

* mat. 7, 15
Ro. 16, 16.
1. Tim. 6, 5

[fol. 292r]

 

Ende voor sulck arbeyden

 

^*Sijn wol en melck begheerlijck

 

^†Des Cruycen Chrisit ient

 

Sijnt vianden bekent

 

Meesters der secten blent

 

Vol boosheyt sonder ent

 

^‡Sprinchanen ydiooten

 

Wt dafgronts put ghesprooten

 

Babels medeghenooten

 

Voor een waerschouwen, v van henlieden went.

 

^* Went v van buyck ghesellen

 

Die schijnheylich int spellen

 

Niet dan van vrede rellen

 

En selue zijn tweedrachtich

 

Hoe sy henlien verstellen

 

Tzijn die de waerheyt vellen

 

En donnoosele quellen

 

Met droomen lueghenachtich

 

Hierom wel voor v siet

 

Ende verwondert niet

 

Wat schijnheylich bediet

 

Van henlien oock gheschiet

 

^†Want de Duyuel figuerlijck

 

Verstelt hem seluen puerlijck

 

In een Enghel vercuerlijck

 

Gheen wonder ist, al doen zijn dienaers yet.

 

Siet toe op alle bede

 

^‡Voor tkint vol der onvrede

 

Der verderffelijckhede

 

Sheeren partije ghebleken

 

Twelck hem stelt in Gods stede

 

Hem verheffende mede

 

Bouen God, oft Gods zede

 

Door des Duyuels insteken

 

Doende openbaer bloot

 

Wonder en teeckens groot

 

Wiens dwalinghe ter noot

 

Brengt de siele ter doot

 

Dus Vrienden wtuercoren

* Ese. 34, 3.

† phil. 3, 18

‡ Apo. 9, 3.

* Ro. 16, 17
Phil. 3, 19

† 2. cor. 11, 16

‡ Dan. 8, 24 ende 9, 26. ende 12, 1.
2. Tes. 2, 3.

[fol. 292v]

 

Wilt ghy niet zijn verloren

 

^‡Mijdt quaden schijn al voren

 

^*Hout v aen Christum, het Fondament minioot.

 

Gheen ander fondatie

 

In Syons generatie

 

Machmen teeniger spatie

 

Leggen, dan Christum claerlijck

 

Dus dat (vol des Gheestes gratie)

 

^†Niet is Svaders plantatie

 

Hoe groot van estimatie

 

Wert wtgheroeyt veruaerlijck

 

Hierom het woort aencleeft

 

Dat God ghesproken heeft

 

Ende oock daer na leeft

 

Op dat ghy niet en sneeft

 

O vriendekens ydoone

 

^*Al quamer in persoone

 

Een Enghel wt den Throone

 

Die anders leert, hem gheen ghelooue geeft.

 

Voor tslot vrienden verheuen

 

^†Wilt gheen ghelooue geuen

 

Elck Gheest hier in dit leuen

 

Maer proeftse al te same

 

Oft sy oock zijn beseuen

 

Van God, diet al doet beuen

 

Want daer zijn bouen schreuen

 

Propheten onbequame

 

Al seytmen openbaer

 

^‡Christus is hier oft daer

 

Gheloouende voorwaer

 

En gaet haer gheensins naer

 

Maer vierichlijck wt minnen

 

Met gherustheyt van sinnen

 

Soect hem inwendich binnen

 

Ghy vint hem daer, ^* als Hooft ende pijlaer.

‡ 1. Tes. 5, 22

* 1. cor. 3, 11

† mat. 15, 13.

* Gala. 1, 8.

† 1. ioan. 4, 1.

‡ mat. 24, 13
Luc. 17, 23

* Eph. 1, 22.
Colo. 1, 18