Veelderhande liedekens, gemaect uut den Ouden ende Nieuwen Testamente

[O Godt hoe ydel zijn alle menschen]

C Een ander.

O Godt hoe ydel zijn alle menschen
Maer voor hem die den Heere betrout
Geen meerder salicheyt en canmen wenschen
Dan tlicht zijns aenschijns, dwelc niet en flout
Als ghy menschen misdaden aenschout
Met straffinghe wilt ghy hem castijen
Wel hem die inden Heer can verblijen.
^* Ghy hebt den sluetel des leuens en des doots
Ghy muecht ons alleen maken salich
Ghy zijt ons stercte inden tijt des noots
Die op v betrouwen, en zijt ghy niet falich
Maer v goetheyt wil ick zijn verhalich
V gramschap duert eenen cleynen tijt
V goetheyt is eeuwich sonder respijt.

Al doode my God, seyt Job al voren

Noch sal ick altijts hopen in hem
^†Hy proeft het Ghelooue zijnder wtuercoren
Door lijtsaemheyt maect hy de zijne tem
Salich zijnse die stantuastighe, ick seker ben
^‡Ende die stantuastich blijuen tot inden ent
Wiens betrouwen op God den Heere is ghewent.

Ghy lijtsamige weest sonder smerten

Betrout op God sonder afgaen
^*Want hy is by den bedructen van herten
So de Psalmiste doet vermaen
^†Al liet een moeder haer kint seer saen
God en sal v niet laten int ghepijn
Inden dach des drucx sult ghy geholpen zijn.

Wat ghy begheert van God almachtich

Ghelooft, ende het wort v ghegheuen
^‡Hy sal veranderen v tranen clachtich
In blijschap, dus zijt vry van sneuen
Laet v herte tot God zijn verheuen

* Apo. 1, 18

† Sap. 3, 5.
Eccli. 2, 5.

‡ mat. 10, 22 ende 24, 23.
mar. 13, 13

* psa. 34, 19 ende 51, 19.

† esa. 49, 15

‡ ioan. 16, 10.

[fol. 280v]

 

Loeft ende danckt den Heere in uwen Gheest

 

^*En voor de menschen v niet en vreest.

 

Princelijcke Godt, ick arm gheuanghen

 

Typer in banden hert ende stijf

 

Met Manasse roep ick, boet mijn verlangen

 

^†Vergheeft O Godt mijn sondich bedrijf

 

^‡In sonden van Moeder ontfinck ick dlijf

 

^*Ghenade roep ick met den Publicaen

 

Och Godt wilt my in staden staen.

* mat. 10, 28

† Mana. 12.

‡ psa. 51, 7

* luc. 18, 13