Veelderhande liedekens, gemaect uut den Ouden ende Nieuwen Testamente

[Menschen wilt al op waken]

C Na de wijse: De traenkens die sy weende, die deden den Ruyter wee.

^*MEnschen wilt al op waken
Dit is hoort mijnen raet
^†Eerst moet ghy v versaken
^‡En laten af vant quaet
Op dat ghy muecht gheraken
Den wech die ten leuen gaet.

Ick wilde wel O Heere

Gaen doen na uwen raet
Maer mijn vleesch quelt my seere
Ick come tot v om baet
Sterckt my met uwer leere
Mijn hoep alleen op v staet.

Die my van herten minnen

Hoort al int openbaer
^*Moet soecken, sal hy vinnen
Wie vint, die nemet waer
En grijp met blijde sinnen
^†Sijn cruys op, en volch my naer.

Ick soude wel van herten

V Hee willen volghen naer
Maer mijn vleesch quaet van perten
Strijt teghen my eenpaer
V cruyce doet hem smerten
Het valt hem veel te swaer.

Ghy sult werden verknesen

Om mijns Naems wille alleyn
^*Hierom en wilt niet vresen
De menschen groot noch cleyn
^†De knecht en mach niet wesen
Bouen sinen meester reyn.

Ick en soude niet veel maken

Van de menschen wreet en fel

* Ro. 13, 11.
Eph. 5, 14

† mt. 16, 24
mar. 8, 34

‡ ps. 34, 15 ende 37, 27.
1. pet. 3, 11.

* Mat. 7, 7.
Luc. 11, 9.

† mat. 10, 38 ende 16, 24.
mar. 8, 34.
Luc. 9, 23.

* Esa. 51, 7.
Jerem. 1, 8
mat. 10, 28
Luc. 12, 4.

† mt. 10, 24
Joan. 13, 16 ende 15, 20,

[fol. 218v]

 

Maer mijn vleesch, dit zijn de saken

 

Dat hout my int ghequel

 

Ten can gheen lijden smaken

 

Het valt my altijts rebel.

 

^* Coemt al die zijt beladen

 

Coemt en leert al van my

 

Ick ben vol van ghenaden

 

Ootmoedich van herten vry

 

Ick en salse niet versmaden

 

^†Al die my volghen bly.

 

Van v wildick wel leeren

 

Ootmoedich van herten te zijn

 

^‡Const ick my omghekeeren

 

Als een cleyn kindekijn

 

Ja const ick my verneeren

 

Mijn vleesch dat doet my pijn.

 

Wildy zijn mijn wtuercoren

 

So sult ghy in alder manier

 

^*Mijn stemme moeten hooren

 

En daer na doen seer schier

 

^†Van nieus worden gheboren

 

Wt water, Gheest ende vier.

 

Ick soude wel willen wesen

 

Herboren al wt den Gheest

 

Maer de sulcke werden verknesen

 

Veruolcht van de werelt meest

 

Mijn vleesch dat is door desen

 

Versaecht en seer beureest.

 

^* Ick ben de wech en tleuen

 

De waerheyt, ^† de duere fijn

 

^‡Ick ben een goet Herder verheuen

 

Wildy mijn schapen zijn

 

So moet ghy sonder sneuen

 

Gaen volghen der stemmen mijn.

 

V stemme laet ghy my hooren

 

Maer tvolghen valt my seer swaer

 

Den wech die ghy zijt vooren

 

Leyt totten Hemel claer

 

Vol Dijstelen ende Dooren

* mat. 11, 28

† mat. 10, 38 ende 16, 24.
mat, 8, 34
Luc. 9, 23.

‡ mat. 18, 3

* Joan. 10, 3

† Joan. 3, 5.

* Joan. 14, 6

† Joan. 10, 9

‡ ioan. 10, 11

[fol. 219r]

 

Is hy, hoe gheraeck ick daer?

 

Coemt al sonder bedincken

 

Menschen groot ende cleyn

 

^*Die dorst heeft, coemt om drincken

 

Leuende water reyn

 

Om niet wil ickt hen schincken

 

Die comen tot mijnder Fonteyn.

 

Daer na sou my wel dursten

 

O Heer mijn toeuerlaet

 

Maer selden ben ick in rusten

 

Door mijns vleesch quaden raet

 

Het soeckt al zijn wellusten

 

^†Altijts gheneghen tot quaet.

 

Wildy mijn Rijck beeruen

 

So moet ghy haest sonder waen

 

^‡Den ouden mensch bederuen

 

En volghen my seer saen

 

Vleesch, bloet, dat moet ghy steruen

 

Sout ghy ^* de croone ontfaen.

 

Is de croon so gheleghen?

 

So ben ick seer veruaert

 

Het vleesch staet my so teghen

 

Door sinen quaden aert

 

So ben ick in alle weghen

 

Van herten so seer beswaert.

 

Wildy met my verblijden

 

Mijn liefste kinderen zijn

 

^*So moet ghy mijn castijden

 

Draghen, een cort termijn

 

Stelt v tot druck en lijden

 

Benautheyt, veruolch en pijn.

 

O Heer wilt my ontfermen

 

Dicwils ben ick benout

 

Aenhoort mijn claghen en kermen

 

Mijn suchten menichfout

 

O Heer wilt my beschermen

 

Van al mijn Vianden stout.

 

Ghy en muecht niet werden flauwe

 

Weest vroom doet mijnen Raet

* Joan. 7, 37.

† Gen. 6, 5. ende 8, 21.

‡ Eph. 4, 22
Colo. 3, 9.

* Sap. 5, 17
4. esd. 2, 43
2. tim. 4, 8
1. pet. 5, 4.
Jaco. 1, 12.
Apo. 2, 10

* Heb. 12, 5.
Apo. 3, 19

[fol. 219v]

 

Dats volcht ^† den wech seer nauwe

 

Die tot den leuen gaet

 

Ist dat ghy blijft ghetrauwe

 

So wert ghy bewaert vant quaet.

 

^‡ Op v betrou ick Heere

 

Ghy zijt mijn toeulucht alleyn

 

Verlaet my nemmermeere

 

Mijn Godt, mijn Capiteyn

 

Ick ben seer broos en teere

 

^*Mijn macht die is seer cleyn.

 

Ick en sal v niet laten

 

^†Vreest niet ghy cleyne Schaer

 

Ick heb om uwer baten

 

^‡Het cruys ghedraghen swaer

 

^*Sonder my (wilt dit vaten)

 

Vermuecht ghy niet te gaer.

 

Wat hebt ghy voor my onweerdich

 

Gheleden en ghedaen

 

Wt den Hemel ghecomen veerdich

 

Wt grooter liefden saen

 

^†Dus maeckt my oock volheerdich

 

^‡V voetstappen na te gaen.

 

^* Ick ben dat Broot seer crachtich

 

Ghedaelt wt mijns Vaders Rijck

 

Wie daer af eet waerachtich

 

Sal leuen eeuwelijck

 

Dus zijt altijts ghedachtich

 

^†Te volghen my blijdelijck.

 

Dit moet ick v noch claghen

 

Dicwils ben ick belaen

 

Mijn vleesch, gaet my so plaghen

 

Wilt my toch helpen saen

 

Het soeckt al zijn behaghen

 

Och wilt my in staden staen.

 

^‡ Leeft ghy na tvleesch behaghen

 

Soo naeckt v tormenten groot

 

Dat sult ghy seer beclaghen

 

Als ghy zijt inder noot

 

En moet teeuwighen daghen

† 4. esd. 7, 7
mat. 7, 13.
Luc. 13, 22

‡ Psal. 7, 2. ende 11, 2. ende 31, 2.

* Apoc. 3, 8.

† Luc. 12, 32

‡ mat. 27, *.

* ioan. 15, 6.

† mat. 10, 12. ende 24, 13.

‡ 1. pe. 2, 21

* ioan. 6, 51.

† mat. 10, 38 ende 16, 24.

‡ Rom. 8, 13

[fol. 220r]

 

Steruen de eeuwighe doot.

 

Hier voor soudick my schricken

 

O God der ^‡ Heeren Heer

 

Wilt ghy my toch so schicken

 

Dat ick doe na v leer

 

Wilt mijnen Gheest verquicken

 

Mijn vleesch te cruycen seer.

 

Ick mensch vol van ellende

 

Van slijck, een aerden vat

 

De crancxste van Adams bende

 

Ick mach wel claghen dat

 

Want hoe ickt keere oft wende

 

^*Seer nau is uwen pat.

 

Och constick nu gheweenen

 

Een zee vol tranen claer

 

My so mochte vercleenen

 

Door v Hemelsche Vaer

 

Op dat ick na mijn meenen

 

Ghenade vercreghe hier naer.

 

O Heer helpt my doen tbeste

 

Coem watter af comen mach

 

Dit liet hier me de reste

 

O Heer hoort mijn gheclach

 

Ontfermt my toch int leste

 

O Heer inden quaden dach.

 

O Prince Godt vol vreden

 

O hoochste Godt triumphant

 

Maeckt my van uwe Leden

 

Neemt my toch in v hant

 

Och Heere aenhoort mijn beden

 

Wilt my doen onderstant.

‡ 1. tim. 6, 15
apo. 17, 14 ende 19, 16.

* 4. esd. 7, 7
Mat. 7, 13
Luc. 13, 22