Veelderhande liedekens, gemaect uut den Ouden ende Nieuwen Testamente

[Mijn God waer sal ick henen gaen]

C Na de wijse: Waer mach sy zijn // die liefste mijn.

MIjn God waer sal ick henen gaen
^*Wilt my op uwe wegen stueren
^†De viant coemt nacht en dach om my staen
En wilt mijn siele verschueren
O Heer laet my v Geest ontfaen
So blijf ick op uwe weghen staen
^‡Dat ic wt tboec des leuens niet worde gedaen.

Doen ick noch in Egypten sadt vast

^*Den ruymen padt ginck ick treden
Doen was ick ghesien en een weert gast
Vande werelt was ick doen in vreden
^†Doen was ick vast in sduyuels strick
Mijn leuen was afgrijselick
Den Duyuel diende ick seer vlijtelick.

Doen ick my totten Heer begaf

En my vander werelt ginck keeren
^‡En liet my helpen wt dat boos gheslacht
En versaeckte Antechrists leeren
Doen wert ick begheckt, en seer versmaet
Om dat ick verachte Babels raet
^*De gherechtighe worden altijt ghehaet.
^† Alsmen oock leest van Abel fijn
^‡Sacharias wiltet niet vergheten
^*Daniel worde met valschen schijn
In den cuyl der Leeuwen ghesmeten
^†So hebben sy de Propheten ghedaen
En ^‡ Christo selue, wilt die verstaen

* psa. 27, 11.

† 1. pet. 5, 8

‡ Apoc. 3, 5. ende 22, 19.

* mat. 7, 13

† 2. Ti. 2, 26

‡ act. 2, 40.

* ps. 34, 20

† Ge. 4, 8.

‡ 2. Paral. 24, 21.

* dan. 6, 16
Hist. vanden Draec. 9.

† mat. 5, 12

‡ mat. 27, *

[fol. 203r]

 

^*De Apostelen en zijn niet vry gegaen.

 

Veel ^† lieuer kies ick onghemack

 

Al met Godts kinderen te lijden

 

Van ick van Pharao ontfang zijn schat

 

Om een cleyne tijt met hem te verblijden

 

Pharaos Rijck is tijtelijck

 

^‡Christus Rijck duert eeuwelijck

 

Hy ontfangt zijn kinder seer blijdelijck.

 

^* In de werelt wert ghy versmaet

 

Wilt v daer inne verblijden

 

Want Christus die wert oock ghehaet

 

Om ons daer door te beurijden

 

^†Hy heeft dat hantschrift wech ghedaen

 

Twelck de viant hadde ontfaen

 

Wildy ghy moecht int leuen gaen.

 

^‡ Als ghy door tvier wert ondersocht

 

^*Den smallen padt begint te treden

 

Verbreyt als dan des Heeren lof

 

^†Blijft vaste op zijne reden

 

^‡Ist saeck dat ghy volstandich zijt

 

^*Sijn woort al voor de menschen belijt

 

^†Hy gheeft v de croon seer blijdelijck.

 

Coemt hier mijn Bruyt, ontfangt v croon

 

Een halsbant root van goude

 

^‡Treckt aen dat cleet seer wit en schoon

 

V jaren sullen niet verouden

 

^*Door den doot zijt ghy int leuen ghegaen

 

^†De tranen worden van v ooghen ghedaen

 

V en sal gheen leet meer comen aen.

 

Nu staet ghy Sion seer wit en schoon

 

Die croon is v ghegheuen

 

^‡De naem mijns Gods en des nieu Jerusalem

 

Heb ick op v gheschreuen

 

Ghy waert mismaeckt en seer ontdaen

 

^*Nu hebt ghy het blinckende cleet ontfaen

 

^†En zijt tot mijnder rusten inghegaen.

 

Dan sullen de Godloose sien

 

En uwe heerlicheyt aenschouwen

 

^‡Dit zijn sy, waer sullen wy vlien?

* Acto. 4, 3 ende 5, 18. ende 7, 58. ende 12, 1. ende 14, 18. ende 16, 19. ende 21, 30.

† heb. 11, 25

‡ esa. 9, 6.
Luc. 1, 29.

* mat. 5, 11
Joan. 15, 18

† Col. 2, 24

‡ 1. pet. 4, 12

* mat. 7, 13
Luc. 13, 22

† Joan. 8, 31

‡ mt. 10, 22

* Luc. 12, 8

† 4. es. 2, 43
2. tim. 4, 8
Apo. 2, 10

‡ Apo. 3, 5 ende 19, 8.

* Joan. 5, 24

† apo. 7, 17 ende 21, 4.

‡ Apo. 3, 12

* Apo. 6, 11

† Heb. 3, 11 ende 4, 3.

‡ Sapi. 5, 3

[fol. 203v]

 

Wiens leuen dat wy hebben ghehouwen

 

Voor sotterny en gheckheyt

 

Wy meynden dat sy waren verleyt

 

Maer nu leuen sy inder eeuwicheyt.

 

Die ons dit Liedeken heeft ghestelt

 

Ter eeren Gods ghesonghen

 

Vanden ouden Adam was hy ghequelt

 

Daer toe so seer ghedronghen

 

Bidt Godt dat de liefde in hem ontfenckt

 

Dat hy hem met Babel niet en vermenckt

 

So mach hy mede comen in sHemels tent.