Veelderhande liedekens, gemaect uut den Ouden ende Nieuwen Testamente
(1582)–Anoniem Veelderhande liedekens–
AuteursrechtvrijC Na de wijse: Wie sal ons dat lieue lange jaer, den Mey met vruechden singhen.
ICk wil een liet beginnen hoort
Mijn herte cant niet lijden
Dat Godes edel ghebenedijde woort
Misbruycket wort aen alle zijden.
Ick roepe v O Hemelsche Vader aen
Dus singhen sy alle gader
Dronckaerts, hoeren en boeuen onbequaem
Daer sy souden singhen helsche vader.
Het een woort is singen en spreken van Godt
Het ander is vloecken en sweeren
By Christus doot, cruys, lijden, wonden root
Dus gaet de werelt Godt eeren.
Men scrijft, druct, leest, speelt, singet, vroech en laet
Van Godt, men gaet hem oock ghieten
Schilderen, backen, wtsteken om eygen baet
Elck wil zijn cost van hem ghenieten.
Om tijtcorting isset mede te doen
Meest om ghewin, name ende fame
Al lesen, spreken, singen sy van Gods Soon
Het leuen blijft al onbequaeme.
Een yeder zijn schalckheyt bedecken gaet
Met Godes woort, so wy hooren
Hoe oueruloedich de werelt leyt in quaet
Sy meynen Gods ghenade is te vooren.
| |
[Folio 171r]
| |
De werelt acht Christum als een rijcke sot
Die zijn goet niet weet te regeren
Daer elc mach af nemen so wat hem dient, int slot
Sijn wercken wil niemant hanteren.
De vreemde moghen wel afstaen
Hy heeft wel kinders tot zijne goeden
Die na haers Vaders wille hebben ghedaen
Sy sullen v daer wel af hoeden.
Ghy singet, maer huylen en weenen beter waer
Ghy draghet een doode siele
Ga naar margenoot*Ghy hebt gheen Godt, noch Christus openbaer
Ephesien leset int tweede.
Ga naar margenoot† Met Niniue treckt sacken aen
Inder asschen doet oprechte boete
Ga naar margenoot‡Wilt ghy niet met Sodoma vergaen
So vallet den Heere te voete.
Ga naar margenoot* Tot Christus voeten v begheeft
Als Maria Magdalena dede
Niet meer (O menschen) als te vooren leeft
Beschreyt v sonden mede.
Ga naar margenoot† Gheen twee sonden te samen bint
Onghestraft blijft daer niet eene
Ga naar margenoot‡Ghy moet v omkeeren als een cleyn kint
Ende volghen Christum alleene.
Wanneer v sonden als beschuldighers opstaen
Teghen v in de laetste tijden
O mensch wat hebt ghi v arme siele ghedaen
Ghebracht in een sware lijden.
Die dit Liet heeft voorghebracht
Een yeder moet het wel hooren
Had hy ghestoruen also onbedacht
Hanskens Maertens had gheweest verloren.
|
|