Veelderhande liedekens, gemaect uut den Ouden ende Nieuwen Testamente

[Ick wil den Heere ghebenedijt]

Den xxxiiij. Psalm: C Na de wijse: Het sadt een sneeu wit voghelken, al op zijn eerste pluyme.

ICk wil den Heere ghebenedijt
^*Louen, prijsen tot allen stonden
Sijnen lof sal ick tot alder tijt
Wtspreken vry met mijnen monde.

Mijn siele sal van den Heere groot

Haer seer hooghelijcke beromen
So dat diet hooren (zijnde in noot)
Blijtschap en vruecht daer af sal comen.

Laet ons den Heere met groot ootmoet

Louen en prijsen altesamen

* Psa. 34, 1

[fol. 164r]

 

Hooghe verheffen zijn Name soet

 

Hy gaet te bouen alle namen.

 

Wanneer ick den Heere sochte siet

 

Antwoordende sprack hy seer sachte

 

En hielp my wt vreese en verdriet

 

Door sinen Gheest, die in my wrachte.

 

Alle de menschen die op hem sien

 

Sal hy seer wonderlijck verlichten

 

Gheen schande sal haer moghen gheschien

 

Twert al goet, en recht wat sy stichten.

 

^† Doen den allendighen mensche riep

 

De Heere zijn stemme verhoorde

 

En hielp hem wt zijn lijden diep

 

Verstroostende met sinen woorde.

 

^‡ De Engel des Heeren legher maect

 

Rontom die hem vreesen en eeren

 

Hy helptse wt noot en hy waect

 

Voor menschen die Gods lof vermeeren.

 

Wilt smaken en met ooghen aenschout

 

Hoe vriendelijck dat is de Heere

 

^*Wel den mensche die op hem betrout

 

Ende van hem scheyt nemmermeere.

 

^† Vreest hem ghy zijne Heylighen al

 

Want die hem vreesen en beminnen

 

^‡Gheen ghebreck haer oueruallen sal

 

Noch gheen ghewelt salse verwinnen.

 

^* De rijcke honghert, en lijdt ghebreck

 

Maer die den Heere neerstich soecken

 

Worden gheholpen wt allen dreck

 

Beurijt van schaey in allen hoecken.

 

Coemt herwaerts kinders en hoort na my

 

De vreese Gods sal ick v leeren

 

^†Al die begheeren te leuen vry

 

Gherust van herten en met eeren.

 

Behoet v tonghe voor alle quaet

 

^*Maeckt dat v lippen niet en spreken

 

Eenich bedroch oft valschen raet

 

Dwelck doet den bant der liefden breken

 

^† Laet af vant quade, en doet dat goet

† Psa. 22, 25

‡ 4. re/ 6. 16 ende 19, 36.
Psa. 125, 2

* Psal. 2, 12. ende 34, 9.

† psa. 128, 1

‡ Psa. 111, 5

* Luc. 1, 49

† 1. Pe. 3, 10

* Col. 3, 14

† psa. 34, 15 ende 37, 27.
Amo. 5, 15

[fol. 164v]

 

Soeckt vrede, en wiltse vermeeren

 

Want so wie dat gherechticheyt doet

 

Op hem sien de ooghen des Heeren.

 

^† Ende zijn ooren oock open staen

 

Om zijn bedinghe te ontfanghen

 

Maer met den quaden salt anders gaen

 

Die de boosheyt altijt aenhanghen.

 

Want seer vreeselijck sal Gods aenschijn

 

Aensien den boosen, en wt roeyen

 

So dat nu noch op gheenen termijn

 

Haer ghedachtenisse sal groeyen.

 

Als de oprechte roept, Godt die hoort

 

En verlost hem wt zijn ellende

 

Door zijn ghenade met goet accoort

 

Maect hy zijn lijden, een goet ende.

 

^* De Heer is de menschen nae by

 

Al die ghebroken zijn van herten

 

Ende den saechtmoedigen helpt hy

 

Wt angst, noot, lijden ende smerten.

 

^† Den Rechtueerdigen seer vele hert

 

Maer Godt beurijt hem van misualle

 

So datter niet een ghebroken wert

 

Van zijndere ghebeenten alle.

 

Dongheluck sal doon, den boosen man

 

En al die den gherechten haten

 

Sullen haer beschuldigen daer an

 

Hoe hooghe dat sy zijn van staten.

 

Godt die verlost wt alle ghepijn

 

De sielen van alle zijn knechten

 

^‡En die op hem betrouwende zijn

 

Sal hy ghenadelijck rechten.

† psal. 33, 18 ende 34, 16.
eccli. 15, 24
1. Pet. 3, 12

* psa. 34, 19 ende 51, 19.
Esa. 57, 13 ende 61, 1. ende 66, 2.

† 2. ti. 3, 12.

‡ Psal. 2, 12. ende 34, 23.
Jere. 17, 7