Veelderhande liedekens, gemaect uut den Ouden ende Nieuwen Testamente

[Ick sal v met vruechden openbaren]

C Na de wijse: O Sion wilt v vergaren.

ICk sal v met vruechden openbaren
Een blijde tijdinghe goet
De Israelijtsche scharen
Te crijghen weder eenen moet
Om Juersalem te bouwen
^*Die als steenhoopen lach
Het Fondament van trouwen
Is gheuonden op desen dach.
De Poorten ende oock de mueren
Laghen heel veruallen int velt
Die Babylonische naverueren
Die waren daer in ghestelt
Ons Heylichdom was heel ontnomen
Tot Godt wy claghen dat
Daer waren also weynich vromen
In alle de schoone stadt.
^† De vrome gingen sy benijden
En sommighe sloeghen sy doot
Niemant en mocht Christum belijden
Oft Antechrist die brachtse in noot
^‡In Gods Tempel was hy gheseten
De waerheyt werpt hy ter neer
Oock alle valsche Propheten
Propheteerden een valsche leer.
^* Desen wech tot deser stede
Die is seer nauwe bereyt
Niet breeder dan een smenschens trede
Als ons Esdras heeft gheseyt
Al die dese Stadt wil winnen
Met alle haer goeden die sy heeft
Die moet desen enghen wech beminnen
Inden tijt dat hy noch leeft.
^† Dese wech die is aen beyde zijden
Vier ende water ghestelt

* psa. 79, 1.
Jere. 9, 11.
Mic. 3, 12.

† Mat. 5, 12
Heb. 11, 36

‡ 2. Tes. 2, 4

* 4. es. 7, 7.
mat. 7, 13.
Luc. 13, 22

† 4. es. 7, 7.

[fol. 154v]

 

Al dien wil wandelen ten tijden

 

Moet hem spoen al met ghewelt

 

En laet v niet vervremen

 

Ghy die nu wandelt met sware pijn

 

^†De gheweldighe sullent innemen

 

Al die manlijck strijdende zijn.

 

Dus wilt v salicheyt soecken

 

Desen tijt der ghenaden aenschout

 

Ghy menschen wt alle hoecken

 

^‡Dese stadt is voor v ghebout

 

Ghy wert hier toe gheroepen

 

^*Die met sonden zijt belaen

 

Desen wech die staet v open

 

Om in dese Stadt te gaen.

 

Na den Gheest moet ghy voort treden

 

^†Ende volghen Christum naer

 

Ende wandelen ^‡ als kinderen des vreden

 

^*Eendrachtich met liefden claer

 

^†En schouwen de valsche doctooren

 

Die vreemde Goden dienende zijn

 

Want sy de rechte leer versmooren

 

Met haren valschen fenijn.

 

^‡ Dese Stadt heeft twelf Fondamenten

 

Van Christo selfs ghefondeert

 

Maer de listighe Serpenten

 

Die haddense omme ghekeert

 

Al na haerder selfs wijse

 

Stelden sy haren dienst daer in

 

Haer fabulen ginghen sy prijsen

 

Al om haer schandelijck ghewin.

 

^* Aen de vruchten so moecht ghijt mercken

 

Wie de rechte borghers zijn

 

Al die schouwen de boose wercken

 

Die der sielen doen groote pijn

 

Het is een arme ghemeyne

 

Sy worden ouer al veriaecht

 

En blijuen by haer ghelooue reyne

 

Volstandich en onuersaecht.

 

Ick en ghelooue niet mijn daghen

† mat. 11, 11.

‡ 4. esd. 7, 7

* mat. 11, 28

† mat. 10, 38 ende 16, 24.
mar. 8, 34
Luc. 9, 24. ende 14, 27.

‡ ioan. 14, 27

* ro. 12, 10.
Eph. 4, 3.
1. pet. 1, 22.

† Deu. 13, 1

‡ eph. 2, 19
Apo. 21, 14

* mat. 7, 15.

[fol. 155r]

 

Dattet Christenen moghen zijn ghenaemt

 

Die een ander veruolghen, veriaghen

 

Dwelck gheenen Christenen betaemt

 

Sy moghen haer wel beroemen

 

Vanden Euangelie ghewis

 

Haer wetenschap sal haer verdoemen

 

Als de liefde in haer niet en is.

 

Ghy Borgers en wilt v niet veruaren

 

Van ^* Jeroboams Goden veel

 

Sijn Priesters zijn Belials dienaren

 

Wten snootsten volcke gheheel

 

Haer vreemde Gods diensten sy stichten

 

In eenen schijn van Goddelijcke duecht

 

Haer schalcheyt die coemt int lichte

 

Daerom zijn wy verhuecht.

 

^†Jeroboams Rijck is aenghestooten

 

Sijnen dienst wert seer veracht

 

Dit doen de rechte medegenooten

 

Die hebbent ter schanden ghebracht

 

Maer de twee gulden Goden

 

Staen verheuen in Berch en dal

 

Al diese wil wtroden

 

Die achtmen als Ketters ouer al.

 

Dese Goden werden aengebeden

 

Van alle Coninghen ghemeen

 

Maer in dese Stadt van vreden

 

Daer en isser noch gheen

 

Al die Afgoderije bedrijuen

 

Oft lueghenen beminnen boos

 

^‡Die sullen hier buyten blijuen

 

By de boose honden altoos.

 

^*De Roouers ende Hoerenjaghers

 

Al die vleeschelijck zijn ghesint

 

Daer toe alle Dootslaghers

 

En zijn in dese Stadt niet bemint

 

Sy en zijn gheen Borghers ghepresen

 

Oft sy moeten zijn bereyt

 

^†In de nieu gheboorte wesen

 

Wt alle ongherechticheyt.

* 3. re. 12, 28 en 13, 33.

† 3. re. 14, 1.

‡ apo, 22, 15

* 1. cor. 6, 10
Gala. 5, 21
Eph. 5, 5.
apo. 22, 15

† Joan. 3, 3.

[fol. 155v]

 

Sy moeten al verlaten

 

Antechrist met zijn Goden ghelijck

 

Oock alle zijn ondersaten

 

^‡Die met zijn comenschap worden rijck

 

Al ist dat sy Babel begecken

 

Sy blijuen nochtans haer vrient

 

Sy wetent weder te bedecken

 

Dat zijn Goden werden ghedient.

 

Hoe soumen moghen versinnen

 

De blijschap sonder ghetal

 

^*Gheen mensche en can bekinnen

 

De groote claerheyt al

 

So ons Joannes verclaerde

 

Verwachten wy sonder verdriet

 

^†Eenen nieuwen Hemel ende Aerde

 

Daer gheenen druck en gheschiet.

 

Princesse wtuercoren en reyne

 

Vernedert v eenen cleynen stoot

 

So sult ghy in sHemels pleyne

 

Verheuen zijn seer groot

 

Wilt malcander hier v gauen deelen

 

Een yeghelijck met goet bescheyt

 

^‡Besteet al v Juweelen

 

Dat sy blijuen inder eeuwicheyt.

 

Prince ghy Vorsten hooch van staten

 

V eynde wil haest comen aen

 

Ghy wereltsche rijcke Prelaten

 

Als eenen roock sal v tijt vergaen

 

Wilt armoet van gheest beclijuen

 

Eer den dach des Heeren coemt

 

Wilt niet langher in Sodoma blijuen

 

Oft ghy blijft met haer verdoemt.

‡ apo. 18, 15

* esa. 64, 17
1. Cor. 2, 9

† esa. 65, 16. ende 66, 22.
1. pet. 3, 13
Apo. 21, 1.

‡ Luc. 11, 33
1. tim. 6, 19