Veelderhande liedekens, gemaect uut den Ouden ende Nieuwen Testamente

[Hoort ghy veruolghers vol van spijt]

C Na de wijse: Ghy Heeren van Rijpelmonde, sydy nu niet thuys.

HOor ghy veruolghers vol van spijt
En al die van Cains gheslachte zijt
Keert v van uwe quade weghen
^*En wilt toch boete doen, want tis meer dan tijt
Oft Godt ghenade wilde gheuen.
^† Wie hem van zijn ongherechticheyt keert
En doet recht, so ons de Schriftuere leert
Die sal Godt ghenade gheuen
Maer wie in boosheyt alle tijt vermeert
Die sal steruen, en niet leuen.

* mat. 3, 8. ende 4, 17.
Mar. 1, 4
Luce. 3, 8. ende 4, 17.
Mar. 1, 4
Luce. 3, 8. ende 24, 46.
Act. 17, 30

† esa. 55, 7
Jer. 18, 8.
Eze. 18, 21

[fol. 130v]

 

Waerom zijt ghy op Gods volc so verwoet?

 

Die v niet en wenschen dan alle goet

 

Och wilt v toch eens bedencken

 

Al tlijden dat ghy Gods Ghemeynte doet

 

^*Want Godt sal zijn vianden crencken.

 

Ghelijck als woluen sydy verstoort

 

Wanneer ghy yewers een schaep bleyten hoort

 

Om te crijghen so legt ghy laghen

 

Och hoe menich schaepken werter nu versmoort

 

^†Ghy sultet noch so deerlijck beclaghen.

 

O ghy Ouerheyt hoe sydy nu misvuecht

 

Dat ghy om tgelooue yemant dooden muecht

 

Waer vint ghy toch sulcx gheschreuen?

 

Maer de oude Slanghe vol alder onduecht

 

Die heeft v sulcx al inghegheuen.

 

Hoe dorfdy v stellen teghen dat edel greyn

 

Dat ghy vermoort Gods ^‡ Hoopken cleyn

 

Dwelck Godt nemmermeer en sal verlaten

 

Ghy stoot v teghen den ^* verworpen steyn

 

Och wilt dit int herte vaten.

 

Ghy hebt v al waerdy resende schier

 

Dat thoont ghy met water, sweert en vier

 

Bedenckt toch dese dinghen

 

Alle die Gods woorden beleuen hier

 

Die sietmen van v omme bringhen.

 

Segt toch vervolgers, wat hebben wy v misdaen?

 

Dat ghy ons gaet vangen, worgen en braen

 

Het is toch om de waerheyt reene

 

Om dat wy alleene op Christum staen

 

Wie heeft toch macht, ons van hem te scheene.

 

Hoe sult ghy connen Godts ordeel ontgaen

 

Want die Godt vreesen, worden van v verdaen

 

Merckt wel op Christus spreecken

 

^†Loon na v wercken, sult ghy ontfaen

 

Als Godt donnoosel bloet sal wreecken.

 

Ghy steeckt v lancx so meer in schult

 

Wanneer ghy meent, dat ghijt wtroeyen sult

 

Voor een coempter thien inde stede

 

Diet cruys oock willen draghen met ghedult

* deu. 32, 53.
Psa. 110, 1
mat. 22, 41
Act. 2, 34.
Ro. 12, 19.
heb. 10, 30

† sap. 5, 3.

‡ Luc. 12, 32

* ps. 118, 22
Esai. 8, 6. ende 28, 16.
mat. 21, 42
Luc. 20, 17
Act. 4, 11.
Ro. 9, 33.
1. Pet. 2, 7

† iob 34, 11
psa. 62, 13.
Jer. 17, 10 ende 25, 14. ende 32, 19.
mat. 16, 27
Rom. 2, 6
2. cor. 5, 10
Apo. 2, 23 ende 20, 12. ende 22, 12.

[fol. 131r]

 

Want sy soecken den eeuwighen vrede.

 

Sy hebben een ghebot vanden Heere soet

 

^*Dat sy niet en souden vreesen de menschen onvroet

 

Die haer lichaem moghen quellen

 

Maer die lijf en siele mach werpen met spoet

 

In dat alder diepste vander Hellen.

 

O Broeders en susters weest wel ghemoet

 

^†Al rasen ons vianden, al waren sy verwoet

 

Laet ons vast op Godt betrouwen

 

Wanneer wy comen in zijn contreye soet

 

^‡Sal hy zijn Auontmael met ons houwen.

 

Orlof ghy veruolgers hier me schey icker van

 

Wist ghy diet heeft gheschreuen, op hem so waerdy gram

 

Hadt ghy hem, hy en soude v niet ontloopen

 

^*Wacht v van meer te strijden teghen tLam

 

Oft ghy sullet noch so iammerlijck becoopen.

* mat. 10, 28
Luc. 12, 4.

† Psal. 2, 1.

‡ Apo. 3, 20

* apo. 17, 14