Veelderhande liedekens, gemaect uut den Ouden ende Nieuwen Testamente

[Hoort doch nu al te samen]

C Na de wijse: Het daget inden Oosten.

HOort doch nu al te samen
Die te Haerlem binnen woont
Heft op v ooghen sonder schamen
Siet wat v wort ghetoont.

Niemant mach hem verschoonen

Ghy hebtet wel ghehoort
Hoe wy gheuanghen v verthoonen

[fol. 128r]

 

Twoort Godts al van de poort.

 

Gaet vraecht het onse ghebueren

 

Wien wy yet hebben misdaen

 

Die sullent tuyghen taller vreu

 

En wiltet nu verstaen.

 

Als ghy dan sult beuinden

 

Dat wy niemant deden verdriet

 

De Schrift salt v ontbinden

 

Waerom dat sulcks gheschiet.

 

Als wy plachten te loopen

 

Met de werelt soet verblint

 

^*En volchden de meeste hoopen

 

^†Doen waren wy wel bemint.

 

^‡ Hoereerders, dobbelaers, dronckaerts

 

^*Sulck hebben wy al gheweest

 

Seer valsch, meyneedich, en pronckaerts

 

En hebben ons Godt niet gheureest.

 

Men conde niet wel bedencken

 

Oft wy waren daer mede besmet

 

Om onsen naesten te crencken

 

Met bedroch te brenghen int net.

 

Doen heeftmen niemant vonden

 

Die ons bestrafte vant quaet

 

Men en heeft ons niet ghevonden

 

Om ons onnutte ghelaet.

 

Maer nu wy weder keeren

 

En doen na Christus raet

 

Nu sietmen ons verheeren

 

^†En worden ter doot ghehaet.

 

Paulus heeft wel beschreuen

 

Dat sulcks sal moeten gheschien

 

^‡Aen die Godtsalich willen leuen

 

Och wilt hier doch op sien.

 

^* De waerheyt leyt op de straten

 

Als ons Esaias ontclooft

 

Die van den quaden wil aflaten

 

Wort van alle man berooft.

 

^† De knecht wort niet verheuen

 

Bouen zijn Heer vermaert

* Mat. 7, 13

† ioan. 15, 19

‡ 1. cor. 6, 11

* Eph. 2, 2
Colo. 3, 7.
Tit. 3, 3.

† mat. 10, 22
ioan. 15, 19.

‡ 2. tim. 3, 12

* Esa. 59, 15
4. es. 14, 17.

† mt. 10, 24
Luc. 6, 40
Joan. 15, 20

[fol. 128v]

 

^*Met Christo sachmen oock dus leuen

 

Dus zijn wy onueruaert.

 

De tijt (spreeckt Christus) sal comen

 

^†Datmen handen aen v sal slaen

 

En wilt daerom niet schromen

 

Tsal hier haest zijn ghedaen.

 

Sou nu sulcx niet gheschieden

 

Alst Christus heeft gheseyt

 

Hoe moecht ghijt anders bedieden

 

Oft hy hadde tvolck verleyt.

 

Ick seg Christus verheuen

 

Die hadde seer ghemist

 

Als hy was in dit leuen

 

Dat hy niet bet en wist.

 

^‡ Dat hy hier woude lijden

 

^*Armoet, hongher en verdriet

 

^†En moeste die steenen mijden

 

Die om hem vloghen siet.

 

De Apostelen allegader

 

Die ghetuyghen Christi saen

 

^‡Die ist oock so ghegaen.

 

Wilt niet wachten om te vercrijghen

 

Een ander vryer tijt

 

^*Laet v niet langher bedrieghen

 

Twoort Gods moet zijn benijt.

 

Soeckt na dat cleynste ghetalle

 

Twelck recht in de leere staet

 

Tis een soet volcxken ouer alle

 

Spoeyt v haest, dat niet en laet.

 

Hoort ick moet v vertellen

 

Ende segghen ons gheloof

 

Daerom sy ons dus quellen

 

^†En achten ons almans roof.

 

^‡ Om dat wy ons laten doopen

 

Opt gheloof na Christus rappoort

 

En segghen na Schrifts ontknoopen

 

Dat den kinderen sulcx niet behoort.

 

De kinderen wy wel weten

* Mat. 27, *
Joan. 19, *.

† mat. 10, 17
Joan. 16, 2.

‡ mt. 26, 37. ende 27, *.

* 2. cor. 8, 9

† ioan. 10, 31

‡ Gen. 4, 8.
1. Joan. 3, 12

* Col. 2, 18.

† esa. 59, 15.

‡ mt. 28, 19
mar. 16, 16

[fol. 129r]

 

^*Dat in ghenaden staen

 

Ten is niet dan ydel vermeten

 

Dat aen haer wort ghedaen.

 

Om dat wy oock gheloouen

 

Dat Christus is reyn ende puer

 

^†Al vanden Hemel hier bouen

 

Ende niet van Adams natuer.

 

Om dat wy weder segghen

 

Den Paus ende Roomsche Kerck

 

sijn comenschap ontlegghen

 

Want ten is niet Gods werck.

 

Wy belijden oock onuerholen

 

Van tcleyne ghebacken broot

 

Dat sy hier swaerlijck dolen

 

Diet eeren voor Godt inder noot.

 

Wy weten dat Christus verheuen

 

^‡Sidt by zijn Vader vailliant

 

Hy en coemt niet weder beneuen

 

Onder der Pharizeen hant.

 

^*Gods eer dat sy vercleenen

 

Al door haer lueghens groot

 

Eylaes men macht wel beweenen

 

Datmen eert alsulcken broot.

 

^† Wy vinden wel beschreuen

 

Van Christus Auontmael

 

Hoe hijt hielt sonder sneuen

 

Met zijn Jongheren int generael.

 

Wy doent oock sonder roeuen

 

Als Christus heeft ghedaen

 

^‡Elck mach hem seluen wel beproeuen

 

Eermen wel ter Tafel mach gaen.

 

^* Met dronckaerts ende schenders der vrouwen

 

(Och dat ghijt wel verstaet)

 

Sijn Auontmael hy niet wil houwen

 

Daermen mercken mach eenich quaet.

 

Daerom ist dat wy leeren

 

^†Den Ban na Schrifts ghebot

 

Al om den quaden af te weeren

 

Vanden goeden, hier isset slot.

* mat. 19, 14

† Joan. 3, 51. ende 6, 31.
Eph. 4, 9

‡ Act. 7, 55.
Eph. 1, 20
1. pet. 3, 22
Heb. 1, 13.

* Ro. 2, 22.

† mat. 26, 25
mar. 14, 22
Luc. 22, 19
1. cor. 11, 22

‡ 1. co. 11, 27

* 1. cor. 6, 10
Gal. 5, 20.

† mat. 18, 8 ende 17.
1. Co. 5, 10
2. Tes. 2, 6

[fol. 129v]

 

Hier is de Coninginne

 

De Ghemeente, Christus Bruyt

 

^*Daer niet besmets mach inne

 

Maer worter ghedreuen wt.

 

Och Broeders altesamen

 

Neemt in danck dit cleyne ghedicht

 

^†Ons gheloof wy ons niet schamen

 

Och wort ghy daer door ghesticht.

 

Wy hopen door dit verneeren

 

Dat ghy aen ons slot en hoort

 

Dat ghy v sult bekeeren

 

En veel sullen comen voort.

 

Clement en een hiet Mary

 

Joris, die dit eerst sanck

 

En hebben niet ghedaen contrary

 

Sijt ghewaerschout, neemtet in danck.

* Eph. 5, 27
apo. 21, 27

† mar. 8, 38.