Veelderhande liedekens, gemaect uut den Ouden ende Nieuwen Testamente

[Ghenade ende vrede]

C Na de wijse: Coemt wt des doots beswaren.

[fol. 109v]

 

^‡GHenade ende vrede

 

Van Godts bermherticheyt

 

Ende troost des Gheests mede

 

In uwer herten bereyt

 

Wensch ick v mijn lieue huysvrou fijn

 

^*En dat Christus Gods soon ghepresen

 

^†Vwe Bruydegom mach zijn.

 

Wilt doch ghedachtich wesen

 

Mijn alderliefste wijf

 

Hoe eerlijck in Godts vreesen

 

^‡Dat wy twee waren een lijf

 

Maer wy beloofdent oock den Heere fijn

 

Dat wy souden zijn te vreden

 

Om zijnen naem ghescheyden te zijn.

 

De tijt is nu voorhanden

 

Ick ligghe hier ghebonden stijf

 

Godt moet ick doen een offerhande

 

^*Voor de waerheyt verlaten het lijf

 

O Heer laet my doch troost gheschien

 

Door uwen Gheest so wilt my helpen

 

Als ick mijnen rug de slaghen sal bien.

 

Och mijn alderliefste vrouwe

 

Al lijdt ghy nu ongherief

 

^†Blijft doch den Heer ghetrouwe

 

Dat bid ick v mijn schaep, mijn lief

 

Laet ons met Judith bekennen gheheel

 

^‡Dat onse straffinghe is noch minder

 

Dan onse sonden, want die zijn veel.

 

^* Al gaet ons Godt castijden

 

Het en sal niet langhe dueren aen

 

Dat wy om de waerheyt moeten lijden

 

Dat is al om beters wille ghedaen

 

Des Heeren werck is wonderlijck

 

De werelt sal hy beschamen

 

^†En maken ons tot Priesters, Coningen rijc.

 

Al zijn de Godloosen verheuen

 

Ghelijck eene water vloet

 

Al wort Godts volck nu verdreuen

 

Ende al stortmen nu haer bloet

‡ 1. Pet. 1., 2

* mat. 16, 16
Joan. 6, 69

† Joan. 3, 29

‡ Gen. 2, 24
mat. 19, 5.
mar. 10, 8.
1. cor. 6, 16
Eph. 5, 31.

* mat. 16, 25
mar. 8, 35.

† Apo. 2, 10.

‡ iudit. 8, 14

* Heb. 12, 6.
Apo. 3, 19

† Apoc. 1, 6. ende 5, 10.

[fol. 110r]

 

^‡Godt die wilse straffen hier na

 

Alle die zijn wtuercoren

 

Veruolghen, dooden, en brenghen in scha.

 

De Schriftuere gaet vermonden

 

^*Dat Godt zijnder knechten doot

 

Sal hert wreken tot dien stonden

 

Als hy coemt in heerlicheyt groot

 

Want onse vianden sullen onder gaen

 

^†Inden vierighen poel worden ghesmeten

 

De rooc haers brants en wort niet wtgedaen.

 

^‡ Dan sullen de gherechtighe blincken

 

Als vlammen in de stoppelen fijn

 

Aen Sions borsten drincken

 

Olie der vruechden, en nieuwen wijn

 

^*Blinckende cleederen worden haer aengedaen

 

^†Ende croonen also schoone

 

^‡Op Sions berch sullen sy heerlijck staen.

 

^* De Heer sal vanden Hemel comen

 

Met veel duysent Heylighen al.

 

Om de werelt te verdomen

 

^†De Basuynen maken gheschal

 

Troost v hier mede mijn huysvrou fijn

 

Als ghy sult hooren segghen

 

Dat ick om Christo ghestoruen sal zijn.

 

Orlof al ist met weenen

 

Janneken Verstralen mijn

 

Godt wil v en mijn kinderkens cleene

 

Eenen goeden Vader zijn

 

Ende draghet doch nu mijn bootschap me

 

Aen alle Broeders en Susters reene

 

Die doe ick groeten met des Heeren vre.

‡ Joel. 3, 21.
Luc. 18, 7.
Apo. 6, 10 ende 19, 2.

* apo. 19, 2

† apo. 20, 10 ende 15. ende 21, 8.

‡ Sap. 3, 7
mat. 13, 43

* 4. es. 2, 39.
Apo. 6, 11

† 4. es. 2, 43.
Sap. 5, 17
2. tim. 4, 8
1. pet. 5, 4
Apo. 2, 10.

‡ 4. es. 2, 42

* Jude. 14.

† mt. 24, 31
1. tes. 4, 16