Veelderhande liedekens, gemaect uut den Ouden ende Nieuwen Testamente

[Ghelooft sy Godt de Heere]

C Na de wijse: Eenen strijt heb ick van binnen.

^‡GHelooft sy Godt de Heere
Ghepresen tot alder tijt
Die ons nu doet bekeeren
Al van des Duyuels strijt
Hy geeft ons nu de waerheyt claer
Dat mercken wy int openbaer
^*De nacht is wech, nu schijnt den dach
Godt is alleen die ons nu troosten mach.
^† Wy waren al verloren
Ghebracht in grooter noot
^‡Nu zijn wy weder gheboren
^*Verlost al vanden doot
Door Christus vleesch, des seker zijt
^†En zijn roode bloet ghebenedijt
^‡De nacht is wech, nu schijnt den dach
Godt is alleen die ons nu troosten mach.

‡ Ephe. 1, 3.
1. Pet. 1, 3.

* Ro. 13, 12.

† Rom. 5, 12
1. cor. 15, 21

‡ Joan. 3, 3.

* Col. 1, 13

† 1. pet/ 1. 2

‡ Ro. 13, 12

[fol. 86v]

 

Dat pant van des Hemels Throone

 

^*Des Vaders Sone goet

 

Sijn woort, zijn leuen schoone

 

Cruys, doot, vleesch ende bloet

 

Was ons beroouet al ghelijck

 

Door des valschen verraders strijck

 

Den nacht is wech, &c.

 

^† De lueghen is gheresen

 

Bemint voor gherechticheyt

 

Bedroch wort nu ghepresen

 

Als nu totter salicheyt

 

^‡So is de blinde werelt verwoet

 

Den nacht is wech, &c.

 

De ghene die dit weten

 

Ende leuen na Gods woort

 

Die worden al doorreten

 

^*Ende iammerlijck vermoort.

 

Bespot, beschimpt, ghegheesselt, doorclooft

 

^†Haer goeden worden haer ontrooft

 

Den nacht is wech, &c.

 

Dus wast by ouden tijden

 

^‡Doen Adam eerst is gheweest

 

De gherechtighe moesten lijden

 

Alsomen van vele leest

 

Dat zaet Cain heeft douerhant

 

Dat is Gods kinderen wel bekant

 

Den nacht is wech, &c.

 

Dus hebben alle Vaderen

 

In beyden Testament

 

^*Gheleden alle gadere

 

Om Gods waerheyt wel bekent

 

^†Dus is Gods Lam recht ende goet

 

Vanden begin ghedoot met spoet

 

Den nacht is wech, &c.

 

Prince Godt wtuercoren

 

Wy dancken v al ghelijck

 

^‡Dat wy zijn nieu gheboren

 

Wt v woort, dwelck blijft eeuwelijck

* Joan. 1, 14

† Osee. 4, 2.

‡ Esa. 5, 20.
Mich. 3, 2

* Joan. 16, 2.
2. mat. 7, *

† mich. 2, 9

‡ Gen. 4, 8.
ioan. 3, 12.

* Heb. 11, 34

† Apo. 13, 8

‡ Joan. 3, 3.
Colo. 1, 3.
1. Pet. 1, 3.

[fol. 87r]

 

Lof, prijs, eer ende danckbaerheyt

 

Sy v al inder eeuwicheyt

 

^*Den nacht is wech, nu schijnt den dach

 

Godt is alleyn die ons nu troosten mach.

* Ro. 13, 12.