Veelderhande liedekens, gemaect uut den Ouden ende Nieuwen Testamente

§ Na de wijse: In doots ghewelt lach ick gheuaen.

COningen ^† en Princen zijn op ons verwoet
Antechrist met zijn adherenten
Hierom ^‡ weest simpel als duyfkens soet
Voorsichtich als Serpenten
Hoort na Paulus belijt
Hy seyt: ^* Tis quaden tijt
Hierom so laet ons ^† waecken
En wesen op de wacht
Voor al Cains gheslacht
Die na ons verderuen haecken.

Mijn lieue Broeders en susters ghemeyn
Wilt v tot strijt bereyden
En vreest tormenten groot noch cleyn
Het swaert is wter scheyden
^‡ Pharao is seer verwoet
Om storten donnoosel bloet
Hierom en wilt niet ^* vreesen
Maer vroom op Godt betrout
Hy ist diet al aenschout
^† Hy en laet de zijne gheen weesen.

Pharao ghy zijt so seer ontstelt
Ghy soeckt te roouen en moorden
Op Godts ^‡ cleyn hoopken toont ghy gewelt
Hoe sult ghijt verantwoorden
Ghy moet haest uwen ganck
Vwen tijt en wert niet lanck
Wilt dit toch eens bedencken
Dit is, hoort mijnen raet
^* Doet goet, laet af van tquaet
Want Godt sal zijn vianden crencken.

Waerom sydy verstoort ende gram
Op ons onnoosel Schapen
Waerom ^† strijt ghy teghen het Lam
Segt ghy verwoedde Papen

† Psal.2,1.

‡ mat.10,16

* Eph.5,16

† 1.pet.5,8

‡ Exo.14,5

* mat.10,28

† ioan.14,18

‡ Luc.12,32

* 1.pet.3,11.

† apo.17,14

[fol. 42v]

 

Ghy volcht der Slanghen raet

 

^* Ghy arch serpentich zaet

 

Alle ghy Cains lieden

 

Ghy sult seer haest ^† ontfaen

 

Na dat ghy hebt ghedaen

 

Gods oordeel sult ghy niet ontulieden.

 

 

 

Niet eer en sult ghy bekennen bloot

 

V schendich moordadich leuen

 

Dit volck dat ghy nu brengt ter doot

 

^‡ Sult sien by Godt verheuen

 

Dan sult ghy al v misdaet

 

Bekennen, maer twert te laet

 

Dan sult ghy suchten en beuen

 

Segghen: en zijn benout

 

Dit zijn, die wy seer stout

 

Veruolchden ende verdreuen.

 

 

 

Dan sult ghy roepen wt grooter noot

 

^* Berghen wilt ons bedecken

 

Al voor des Heeren aenschijn bloot

 

Wee ons ^† wtsinnighe ghecken

 

Wy achten dit volck onvroet

 

Wat helpt nu ons groote goet

 

Dat wy hooch waren gheseten

 

Hoe waren wy so blent?

 

De waerheyt onbekent

 

Sheeren wech hebben wy niet gheweten.

 

 

 

^‡ Al die Christum hebt aenghedaen

 

Mijn lieue Christen knechten

 

V vianden comen gheweldich aen

 

Ras rust v op om vechten

 

Het ghelt nu elcken bloot

 

Het leuen oft de doot

 

Dus en laet v niet beweghen

 

^* Vreest niet al zijnse groot

 

Ghy ^† sultse verslinden als broot

 

Vrijmoedich so treckt haer teghen.

 

 

 

Als Pharao coemt om v te vaen

 

Met alle zijn dienaren

 

Met vleesch noch bloet zijt niet belaen

* Mat.3,7.

† mat.16,27 Rom.2,6 apo.22.12

‡ Sap.5,5.

* Oze.10,8. apo.6,16.

† sapi.5,4

‡ Gal.3,27.

* mat.10,28

† nu.14,9

[fol. 43r]

 

Vreest niet de boose scharen

 

Men sal v leyden ghewis

 

Na den steen oft tgheuanckenis

 

In putten salmen v stellen

 

Dan sullen sy v blint en doof

 

Vraghen na v gheloof

 

Ongheueynst willet haer vertellen.

 

 

 

Wanneer ghy nu in de banden zijt

 

Denckt niet wat ghy sult spreecken

 

Godt salt v gheuen ter seluer tijt

 

Merckt op haer schalcke treecken

 

Sy thoonen een ^* schaeps ghelaet

 

Binnen zijnt woluen quaet

 

Men kentse aen haer vruchten

 

Betrout Gods woorden soet

 

Van hem coemt niet dan goet

 

Sijt ghy benaut? wilt tot hem vluchten.

 

 

 

Legghen sy v dan op de pijnbanck

 

Met tormenten v beswaren

 

Bidt den Heere in dat bedwanck

 

Dat hy toch wil bewaren

 

Altijts v herte en mont

 

Dit maeck ick oock cont

 

Vreest niet voor dese dinghen

 

Tsy dat sy v gaen braen

 

Oft dats v hooft af slaen

 

Oft dat ghy in den Tob moet springhen.

 

 

 

Eest dat ghy vast op Christum staet

 

So salt v wel ghelucken

 

Broer Balthen, noch gheen ander Prelaet

 

Sal v niet connen verrucken

 

Van v ghelooue ghewis

 

Dat v van Godt ghegheuen is

 

^† Die zijnen Naem belijden

 

Sal hy belijden claer

 

By zijnen Hemelschen Vaer

 

Daer sult ghy v eeuwich verblijden.

 

 

 

^‡ Al wert ghy nu een weynich ghecastijt

 

En wilt v niet verschricken

* Mat.7,15

† mat. 10,32 Luc.12,8.

‡ Heb.12,6.

[fol. 43v]

 

Ia dat ghy om de waerheyt lijt

 

Gods Gheest sal v verquicken

 

^* Vreest niet ghy hoopken cleyn

 

Volcht uwen Capiteyn

 

Treckt ghewillich met hem te velde

 

Hout v onder zijnen standaert

 

Weest vroom, stout, onueruaert

 

^† Neemt so zijn Rijck in met ghewelde.

 

 

 

Ist dat ghy lijdet so Christus de

 

V vleesch en bloet wilt steruen

 

Blijschap en vruecht, en eeuwighe vre

 

Sult ghy daer voor beeruen

 

In zijn Rijck excellent

 

Daer vruecht is sonder ent

 

Wilt hier altijts op dincken

 

Daer suldy onbelet

 

^‡ Springhen als Calueren vet

 

^* Als de Sonne sult ghy blincken.

 

 

 

O Princelijcke Vader ghebenedijt

 

V hoopken wilt bewaren

 

Want ghy ^† den oppersten Herder zijt

 

Een Heere der heyrscharen

 

Cain met zijn ghebroet

 

Veruolcht v Schapen soet

 

O Heere aenhoort ons claghen

 

Sterckt ons, want wy zijn teer

 

Verlaet ons nemmermeer

 

Ons Cruyce wilt helpen draghen.

* Luc.12,32

† mat.11,12.

‡ Mal.4,2.

* Mat.13,43.

† heb.13,20