Veelderhande liedekens, gemaect uut den Ouden ende Nieuwen Testamente

§ Na de wijse: Niet al ghelijck, Die roepen Heere Heere.

^† BLaest met trompet
In Sion onuerhoedich
Op sHeeren Berch net
Huylt en weent tranen oueruloedich
Ras onghelet
Al dInwoonders voorspoedich
Der Aerden besmet

† Iohe.2,1 ende 15.

[fol. 32v]

 

Moeten verstoort worden weemoedich

 

^‡ Want de dach om tvolck pijnen

 

Vol duystere bruwijnen

 

Diet al sal doen verdwijnen

 

Is na by int verschijnen

 

^* Ghecrijsch, discoort

 

Wert dan in tswerelts rijcke

 

Ghesien, ghehoort

 

En was noyt van dach der ghelijcke.

 

 

 

^† Snel onuersien

 

Sal sHeeren dach ghenaken

 

Om toncruyt wtwien

 

^‡ Comende als vier, hittich int blaken

 

Niemant ontulien

 

Mach sHeeren dach der wraken

 

Vrienden by dien

 

^* Wilt neerstich bidden en waken

 

^† Want dien dach vol onurede

 

Wert bittere van zede

 

Een dach der duysterhede

 

Vol drucks en gramschap mede

 

Een dach ghestelt

 

Om door steden en hoecken

 

Sterck met ghewelt

 

Alle de boosheyt tondersoecken.

 

 

 

De Heere goet

 

Sal in dien dach gheresen

 

De menschen onuroet

 

Verdriet aendoen (also wy lesen)

 

^‡ Blint sonder moet

 

Sullen sy zijn mispresen

 

Ende haer bloet

 

Sal als stof wtghestort wesen

 

Als dreck wert haer lichame

 

^* Haer siluer en gout tsame

 

Salse na den betame

 

Niet verlossen der blame

 

Verderuen groot

 

Sal in dien dach ghebueren

‡ Ioel.2,1. Amo.5,18 seph.1,14.

* Ose.10,8. Luc.23,29 Apo.6,16

† 1.Tes.5,2. 2.Pe.3,10

‡ 2.Tess.1,8 2.Pet.3,7

* mt.24,42 mar.13,33.

† sep.1,14. luc.17,24.

‡ seph.1,17.

* Pro.11,4 Eze.7,19. seph.1,18. Eccli.5,10

[fol. 33r]

 

Op d’Aerde bloot

 

Onder alle die creatueren.

 

 

 

tVier toornich wreet

 

Is ontsteken behendich

 

En tsal bernen heet

 

Tot donderste Helle onendich

 

^† Wrake bereet

 

Heeft Godt seer ellendich

 

Sgheests bruylofts cleet

 

Dient aenghedaen, blinckende ^‡ wtwendich

 

Want den boosen ter schanden

 

tVier des toorens voorhanden

 

Sal al tgroeysel der landen

 

Verslinden en verbranden

 

De tijt haest nv

 

Van het verderuen smertich

 

^* Betert doch v

 

Leetwesen toogende rouhertich.

 

 

 

Huylt met gheclach

 

Voor v sonden fenijnlijck

 

Want sHeeren dach

 

Coemt ghelijck een woestheyt verdwijnlijck

 

Noyt yemant sach

 

Sulcken dach ooghenschijnlijck

 

Met handen gheslach

 

O wee, o wach, ^† wert tgheschrey pijnlijck

 

Steeckten en smerten treurlijck

 

Sullen voelen gheduerlijck

 

Als een vrouwe suerlijck

 

Kinderkens baert natuerlijck

 

Wee henlien al

 

Die dan vol sonden crielen

 

Want op dien dach sal

 

Godts toorne de sondaers vernielen.

 

 

 

^‡ Siet dien dach hier

 

Als een ouen int gloeyen

 

Sal comen schier

 

Om de Godtloosen te verbroeyen

 

In gheen quartier

† Esa.34,8 ende 63,4.

‡ Oft inwendich.

* mat.4,17 Mar.5,19

† mt.24,30. Apoc.1,7.

‡ Mala.4,1

[fol. 33v]

 

Sal tack noch wortel groeyen

 

Het swaer dangier

 

Salt dien dach al tsamen wtroeyen

 

Want Godt (na Schrifts verhalen)

 

Sal wintstormich hier dalen

 

^† Met viervlammich doorstralen

 

^‡ Om loon na werck betalen

 

^* Waeckt wel hier by

 

Eer dat ghy coemt in weene

 

Want dien dach onury

 

Weet niemant meer dan hy alleene.

 

 

 

^† Niemant weet yet

 

Van sHeeren openbaren

 

Somen blixem siet

 

Van het Oosten na tWesten varen

 

Sghelijcks gheschiet

 

Sheeren coemstich verclaren

 

Wel hem die dan niet

 

^‡ Naeckt wert vonden metten sondaren

 

Want in dien dach verheuen

 

Des Oordeels wreet beseuen

 

Sal elck, na daet bedreuen

 

Rekenschap moeten gheuen

 

^* Ia woorden, maer

 

Onnut, ydel ghesproken

 

Sullen hier naer

 

Van Godt niet blijuen onghewroken.

 

 

 

^† Wt dijn woorden fijn

 

Suldy sonder beswijcken

 

Gherechtueerdicht zijn

 

Oft wt v woorden verdoemt blijcken

 

Want na taenschijn

 

Sal Godt tOordeel niet strijcken

 

Maer ins tijts termijn

 

Straffen den armen als den rijcken

 

Want Godt niet om verstercken

 

^‡ Sal gheen persoon aenmercken

 

Neen, maer leeck ende clercken

 

^* Loonen na hare wercken

† Esa.30,30 2.Tes.1,8.

‡ mt.16,27 Rom.2,6. 2.cor.5,10. apo.22,12.

* mt.24,42 ende 25,13.

† mt.24,36 mar.13,32. Acto.1,7.

‡ 2.Cor.5,3 Apo.3,18. ende 16,15.

* mat.12,36

† 2.re.1,16 mat.12,37 Luc.19,22

‡ Deut.10,17. 2.pa.19,7 Iob 34,19 Sap.6,8. 1.Pe.1,17

* iob 34,11 psal.62,13 Ier.17,10 ende 25,14. mat.16,27

[fol. 34r]

 

^† Met zijn monts sweert

 

Aen bey zijden scherpsnedich

 

So sal Godt expeert

 

Straffen al die zijn vonden ledich.

 

 

 

^‡ Ledich beswaert

 

En blijft ter Merckt niet staende

 

Maer inden wijngaert

 

Werckt neerstich, so Schrift oyt vermaende

 

Ras onghespaert

 

^* Wert de Basuyne slaende

 

En met gheluyts aert

 

^† De Hemelen werden vergaende

 

En dElementen cierich

 

Sullen seere dangierich

 

Smelten van hitten vierich

 

O vriendekens manierich

 

^‡ Als desen tijt

 

Gheschiet, schickt dat ghy claerlijck

 

Onstraffelijck zijt

 

En onbeuleckt in vrede eerbaerlijck.

 

 

 

Die hier tijt heeft

 

Die wake tallen stonden

 

Want als tijt begheeft

 

^* Werter gheenen tijt meer beuonden

 

Hebt ghy ghesneeft

 

Met de Godloose honden

 

Ter tijt dat ghy leeft

 

Toont oprecht leetwesen van sonden

 

Wilt tot den Heere vluchten

 

En na Iohannes pluchten

 

Met rouhertich versuchten

 

^† Doet boetweerdighe vruchten

 

^‡ Want aen den boom

 

Is ghestelt hier op dAerde

 

De bijl seer vroom

 

Om den boom vellen na zijn waerde.

 

 

 

Elck boom die draecht

 

Gheen vruchten goet ghebleken

 

^* Daer de worm knaecht

† Heb.4,12 Apo.1,16. ende 2,16. ende 19,15.

‡ mat.20,3

* mat.24,31 1.Cor.15,52.

† Ps.102,27. Esa.51,6. mat.24,25 2.pet.3,10.

‡ 2.pe.3,14

* Apo.10,6

† Mat.3,8 Luc.3,8.

‡ mat.3,10 ende 7,19. Luc.3,9.

* esa.6,24 Iudit.16,25. mar.9,47

[fol. 34v]

 

Int Helsche vier wert hy ghesteken

 

Eer ghy belaecht

 

Wert, van diet al sal wreken

 

^* Gansch schoone wtuaecht

 

V oude sondighe ghebreken

 

Ende na het behooren

 

^† Als zaet wt Godt gheboren

 

^‡ V gherechticheyt vercoren

 

Bereyt voor dat oordeel voren

 

Verloren laet

 

^* Gheenen tyt vrienden ingienich

 

Maer bereet staet

 

Teghen sHeeren coemste onuersienich.

 

 

 

^† Alsment niet meent

 

Sal des Heeren dach rijsen

 

Blijft niet versteent

 

Maer met een gheestich veriolijsen

 

Het herte reent

 

Van tsuer deesems afgrijsen

 

Ootmoedich vercleent

 

Weent en wilt goet berou bewijsen

 

^‡ Met lendenen en ghedachten

 

Op gheschort, door sGheests crachten

 

Wilt den Bruydegom verwachten

 

^* De wijse maechden slachten

 

Sult ghy certeyn

 

Die waren in ghelaten

 

Met olie reyn

 

Der caritaten in haer vaten.

 

 

 

V vaten schoon

 

Des gheloofs, na tbeschrijuen

 

Met olie ydoon

 

Der liefden, wilt gheestich verstijuen

 

Daer niet v loon

 

^† Wert met de dwase wijuen

 

Wien tHemels troon

 

Als dander niet mochte beclijuen

 

Maer moesten blijuen buyten

 

Dus door des gheests virtuyten

* Colo.3,9.

† 1.Ioa.3,5 ende 18.

‡ Eccli.18 25.

* Eccli.4,26.

† Mat.24,44.

‡ Luc.12,35 eph.6,14. 1.pet.1,13.

* Mat.25,4.

† mat.25,13

[fol. 35r]

 

Eer de duer gaet sluyten

 

Opent ws sins conduyten

 

Hier niet en vaeckt

 

Maer altijts sonder letten

 

⁺ Nuchteren waect

 

Voor tgeluyt van sHeeren trompetten.

 

 

 

^‡ Strompets gheluyt

 

Sal druckich dus soneren

 

Ghy doode coemt vuyt

 

Wilt ten oordeel compareren

 

^* Verciert als Iuyt

 

Met sgheests blinckende cleeren

 

Wert Christus Bruyt

 

Salich met die Schaepkens vol eeren

 

^† Maer de Bocken onblijde

 

Werden teewigen tijde

 

Ghestelt ter slincker zijde

 

Met de vermaledijde

 

Int Helsche torment

 

By sDuyuels metghenoten

 

Daermen sonder ent

 

Verdoemt in moet blijuen gesloten.

 

 

 

Dus voor een slodt

 

Met stantuastich betrouwen

 

Vriendekens ^‡ vreest Godt

 

En gheduerich tot sdoots benouwen

 

Hout zijn ghebodt

 

Ghehoorsaem sonder flouwen

 

Dat ghy salich lodt

 

Crijcht duer sgheests gracelijck bedouwen

 

Want Godt niet om versieren

 

Hoochst Princier der Princieren

 

Diet al heeft int regieren

 

Aenschout ^* herte ende nieren

 

Sterck ende cranck

 

Tmoet al voor hem vertooghen

 

Sijn oordeel stranck

 

Hebt doch (vrienden) altijt voor ooghen.

+ 1.Pet.5,8

‡ mat.24,31 1.cor.15,52 1.tes.4,16

* iudit.10,3

† mat.25,33

‡ eccle.12,11 4.Esdr.16,68. apo.14,7.

* 1.reg.16,7 Psa.7,10. Iere.11,20 en 17,10. Act.2,24. Apo.2,23.