Utrechts zang-prieeltjen

[p. 202]

[Wat maeckt ghy Venus spruyt?]

Stemme: Verheft u diep gesucht, &c.

W At maeckt ghy Venus spruyt?
Wat maeckt ghy kleyne guyt?
Wat maeckt ghy doch in my, die niet van't minnen houw
Om dat ick niet en vind' ghetrouheyt in Me-vrouw:

2 't Scheen eertijts wel te zijn
Of sy haer gunst tot mijn
Alleenigh stellen wou, maer ach! nu ick begin
Te vryen met het hert, ist maer beveynsde min.

3 Wegh, wegh, Cupido wegh,
Ghedoogh niet dat ick legh
Gevangen en geboeyt in liefdens slaverny,
Al wat mijn Iuffrou doet, is niet dan beveynsery.

4 Schoon sy my kusjes jont,
En dat haer lieve mont
Mijn vriendelijck toelacht, on-minne teeckens toont,
Ten is maer veynsery, die in mijn Iuffrou woont.

[p. 203]

 

5. Of sy my gunste biet,

 

Maer 't hert en meent het niet

 

Dies gaet het nu met my, ghelijckerwijs het doet

 

Als eener die bedeckt het bitter nu met soet.

 

 

 

6 't Soet dat sy toont aen mijn

 

Is soetheydt in de schijn:

 

Maer bitter in der daet, dies ick de min veracht,

 

Wegh, wegh, Cupido wegh, vertreckt uyt mijn gedacht.

E.C.