Turias ende Floreta

Hoe Turias die ionghelinck met sijn volc tot sijns vaders lant reysde. Ende hoe hi ordineerde²⁾ secretelicken wederom te keeren om Floreta te soecken.

ALs die schippers metten boot aen tgroot schip quamen, vertelden si Turias hoe si Floreta ghelaten hadden, dies hy screyende wordt, totten graef segghende. Tsijn alle mijn vyanden die hier inden schepe sijn, maer ghy grave sijt die principaelste, ende na dier tijt en wilde hy tot nyemandt meer spreken dan alleene tot sinen schiltknecht, dien hi gheboot dat hy den schippers bevelen soude om te reysen na sijns vaders landt die welcke dat alsoo deden, ende quamen binnen .v. daghen in sijns vaders landt, daer si alle tsamen met grooter blijschappen ontfangen waren. Turias

2) Beval

[p. 18]

bedecte sinen druck ten besten dat hi conde, op dat die coninck sijn vader niet weten en soude tgene dat hem gheschiet was, noch niemant en dorste daer af vermanen¹⁾ wt vreesen des conincx sijns vaders. Aldus bleef Turias int hof zijns vaders met grote verborgen droefheyt ontrent .xv. daghen, soo dat hem niemant vanden ghenen die met hem gheweest hadden en sach dan sijn schiltknecht, totten welcken hi sprac, seggende: Weet mijn vrient dat ic therte vol drucx hebbe mits mijn quade fortuyne, nacht ende dach dinckende op Floreta die ic nemmermeer vergeten en mach. Daerom bid ick u mijn goede vrient dat ghi ter liefden van mi arbeyden wilt om een schip te crijghen dat beste dat ghi cont, ende soect ander scippers, die u sekerheyt doen u bevel te doene, ende ic bidde u dat ghi dat doet so secretelijck als ghi cont, op dat daer af nyemant en wete. Ende en conde gheen ander scip vinden dan dat mijne so maect dat bereet, maer en begheert niemant vanden ghenen die met ons gheweest hebben, noch en laet henlieden daer af niet weten, want ick en wil nyemant van henlieden met mi hebben, doet int scip alle tghene des wi behoeven, doet daer in drie peerden, alle mijn harnasch ende alle tghene dat ons van noode soude moghen sijn, maer ick bidde u dat ghijt seer secretelijcken doet gelijc ic u dat gheseyt hebbe. Dye schiltknecht dit hoorende en was van desen sijns heren voornemen niet wel te vreden, duchtende dat hi hem loghenachtich vinden soude, want hi gheseyt hadde dat hi Floreta ghelaten hadde neven een fonteyne soet van water daer veel cruden stonden, met de welcke si haer eenigen tijt soude moghen onderhouden. Dwelck hi al tsamen gheseyt hadde om Turias te vertroosten, daerom en wist hi niet wat segghen, want hi sorchde²⁾ dat Floreta doot was. Desen noch-

1) Spreken

2) Vreesde

[p. 19]

tans niet tegenstaende heeft hi binnen vier daghen alle tghene dat hem sijn heere gheheeten hadde volbracht. Daer na is hi aen hem comen segghende. Heer, tis al ghereet alsoo ghi mi bevolen hadt daerom alst u belieft sullen wi tschepe gaen, want tis nu goet weder, God verleene ons beter avontuere dan wi dander reyse hadden. Turias dat hoorende sprack totten schiltknecht segghende. Vrient desen nacht sullen wy tscepe gaen wilt God, daerom alst avont is doet dat schip aenden oever brenghen. Ende dit dede hi al tsamen om dat die coninck ende die coninghinne niet vernemen en souden op dat si sijn reyse niet beletten en souden.