De Tsjerne. Jaargang 23

[p. 371]

Berber van der Geest / Gedichten

In hus fan waermte

se sizze
dat hjirnjonken my
rjochts ûnder om 'e hoek'
in hûs winkt
sûnder doarren
in inkeld iepen gat
skreaut wolkom oan 'e frjemdling
omdoarmjend yn 'e strjitten
fan d'iensumheit

se sizze
de treppens binn'
omearmingen fan freonskip
de keamer in petear
fan waerme hichte
it lewant biklaeid
heal skatterlaits/heal trien

it moat der
noflik wêze
dat sizze se tominsten

[p. 372]

Ljocht/punt/ljocht

ik sjoch de dagen
stadich lytser wurden
it fûle ljocht keart
nei har útgongspunt werom

spraet ha 'k myn earmen
en 't omklamme yn 'e
greep / stiif en ynhellich
mar doe't ik
yn 'e nije wike seach
ûntkaem it ljocht my
tusken tomm' en fingersein

nou forfljocht it
en ebbet ôf oer 'e
strânnen fan hjerstblommen
pypkeskûlboartsjend achter
de hellings fan 'e winter

mar ienris sil de floed
opsetten komme
en wachtsje ik mei it
smiten fan it ies.