De Tsjerne. Jaargang 23

[p. 344]

Sikke Doele / Gedichten

Net mear to kearen

dou stiekst de wyn yn 'e brân
dou hast him net mear yn 'e hân
de wyn kiest alle streken

de seis- acht- en hûndertpoaten
fleane oer de fjilden
sparje gjin gerske gjin blom
frette der mar hwat yn om

griis chartres sakket ynienen
as stof by de heuvel del
kathedraelgesang waeit it easten yn
dat die it dochs al meastentiids

in keninginne forsûpt har yn de
paleisfiver foar de eagen fan
har dochter en twa lakeijen
se gnyskje mar hwat, dy trije

[p. 345]

Sic transit gloria amoris

hea, tink ik, har hûd haw ik
twa jier lyn streake
en nou sit se dêr mei in oar
hwat in hûd
jow my noch mar in konjakje willem

trochtinken wurdt myn treast:
har hûd hat him dy twa jier
ommers allang fornijd jong
nei eltse simmer hinget
de hûd der ommers
as fellen by
jong