De Tsjerne. Jaargang 23

Redaksioneel II

Redakteur Tr. Riemersma hat ús meidield ta it ynsicht kommen to wêzen, dat syn stânpunt fan eartiids ynsake it opsizzen fan de fuzy, dy't in foarige redaksje mei de redaksjes fan de literaire tydskriften Asyl en Quatrebras oangien wie, net mear strookt mei syn tsjintwurdige opfetting oer dy kwestje.

Omt Riemersma syn stânpunt yn dizze saek wizige hat, mient er net langer as redakteur oan De Tsjerne meiwurkje to kinnen.

Hy forsiket om opnimmen fan it neifolgjende:

Forklearring

Yn de kwestje fan 'e redaksionele fuzy tusken Asyl, Quatrebras en De Tsjerne hawwe fjouwer fan 'e fiif Tsjerne-redaksjeleden har net hâlden oan 'e ôfspraek mei Asyl en Quatrebras. Sy binne, ûnder druk set troch in ôffurdiging út it bistjûr fan Je Maintiendrai en bang foar it forlies fan fiifentweintich abonné's út 'e literaire élite, weromkommen op it ienriedich nommen bislút om Bauke de Jong op to nimmen yn 'e redaksje fan De Tsjerne.

Better net to witten bin ik sels de iennige dy't de manipulaesje fan 'e Tsjerne-redaksje ea fordigene hat. (Sjoch de Leeuwarder Courant fan 28 maert 1968). Ik leau, myn arguminten wage net tsjin de wurdbrek op. As de Tsjerne-redaksjeleden Bauke de Jong net sa gaedlik founen as redakteur, dan hienen se net ta dy redaksionele fuzy oergean moatten; as sy mienden de bineaming fan De Jong net mear hanthavenje to kin-

[p. 327]

nen troch it driigjend lêzersforlies en it ‘veto’ fan Je Maintiendrai, dan hienen se ôfgean moatten; en as se tsjin alle wjerstân yn mienden in goede kar dien to hawwen mei Bauke de Jong, dan hienen se dy kar ek tsjin heuch en meuch fordigenje moatten. Allinne Lolle Nauta hat it lêste dien.

Sels haw ik my yntimidearje litten troch fiifentweintich swiergewichten út 'e Fryske literatuer en ûnder de yndruk fan demagogyske gjalpen as ‘algemien bilang’ en ‘fuortbistean fan De Tsjerne’ de bineaming fan Bauke de Jong net fûl genôch fordigene. Ik miende doe dat it forried oan Bauke de Jong myn redakteurskip net ûnhâldber makke. Dat hat in forsin west.

Gau, 24 augustus 1968.

TR. RIEMERSMA

Syn mei-redakteuren miene it bislút fan Riemersma respektearje to moatten. Mei him is oerienkommen syn ôfgean as redaksjelid yngean to litten op 1 oktober o.s.

De Redaksje,

DURK VAN DER PLOEG

LEO POPMA