De Tsjerne. Jaargang 23

[p. 309]

Berber van der Geest / Fersen

Maskers

in masker lit him maklik mjitte
laitsjend
gûlend
hokker wolle jo
't is mar hwer't jo jo
't noflikst achter fiele
en mei in ilestykje om't ear
gjin kâns en tôgje 't wei
lykwols
it wol omraken switte
en is de fentilaesje min
jo lizze it stjerrend ôf
mar troch 'en tiid
falt soks hwat ta
to sjongen en to laitsjen
en it antlit hâldt de tearen
yn 't wenstige biklach
to gûlen
en de wrâld hat der gjin weet fan.

[p. 310]

De deaden by de libbenen dounsje

hja lake
en 't ronfelige fel
skoude fansiden
deadopskreaune stakkert
de holle eagen as parafrazen
forweegden leech
achter it fjirde advokaetsje
noflik in joun
mei in lichtsettich stik
en in buorfrou
dy't jan en allegear
oer 'e tonge praette
(it muzyk koe der krekt op troch)

kom leave
dounsje wy de douns
fan de deaden
de libbenen
prate wol
prate wol
prate wol