De Tsjerne. Jaargang 23

[p. 81]

[Nummer 3]

Jan J. Bylsma / Gedichten

Unnocht

de wyfkes mei
de earste poppe
yn 'e bernewein
haw in glimk
yn 'e eagen fan
ik bin de earste
en de lêste
ik haw it stopjern
of alteast it
naeijen útfoun

as ik dan mei
nocht nei har
nylonskonken
en de amper
restaurearre
tytsjes sjoch
tink ik mei
nocht oan ûnnocht
oan de finzen
manlju yn 't fabryk

[p. 82]

It studint

(non scolae, sed pecuniae discimus)

de hearen fan
paula puera
erat virgo
en de onterechte
aep
de tsjinwurdige
frije jonges fan
tsien oer read
en de heechst populaire
deeseisensechstich
bin oer net al
tolange tiid de
kleijende doktoren
mei in ton skjin
yn 't jier of de
ûnoantaestbre hearen
fan 'e rounom
renommearre
klassejustysje

[p. 83]

Natur

yn 'e nea
genôch
priizge natûr
ha 'k nei in ûre
skjin myn nocht

nei elke beam
komt wer in beam
nei elke greide
wer hwat lân

sa út en troch
sjoch ik in ré
mar dat is in forsin
nei alle wierskyn

dy sil wol
losbrutsen wêze
út it net sa drok
bisochte hartekampke

[p. 84]

In memoriam

de baer wie
delset yn 'e
achterkeamer dêr't
de tillefoan ek
oan 'e muorre
rinkele

ik wie tige
warber mei
airwick de dea en it
libbensgreat bisef

hwat meitsje ik
my drok as
dit de ein
de absolute
ein wêze moat