De Tsjerne. Jaargang 23

[p. 7]

Sjouke Voolstra / Fersen

dûmny sei fan 'e moarn
syn ûnleauwe weimoffeljend
yn aloan dreger preken
jimme sille gjin oerhoer dwaen

mar de sinne is noch net ûnder
of it jongfolk boartet
by it lykhúske op it tsjerkhôf
it oerâlde spultsje fan
wês fruchtber en formannichfâldigje

se binne net mear foar ien god
en ivich itselde gat to fangen
moatte jo mar rekkenje...

[p. 8]

Playboy of The kingdom of God in the U.S.A.

efkes de oarlochsekonomy
opfiere en wy hawwe
allegearre
toe nou bêste leave minsken
in saneamd
minskwurdich bistean:
cardin styled jackets
masculine look in underwear
jaguar sportscar mei
bypassende aftershave
in farske playmate
eltse moanne
yn 't roune bêd

mei tank oan greonterp:
dat keninkryk fan dy
hugh heffner
wurdt dat noch hwat?

[p. 9]

Beafeart nei Ljouwert

freed
de njoggenûre bus fol boeren
krekt by de kij wei
op paed nei kij
praet oer kij

nei de stadige prosessy
oer 't saeilân en 'e fémerk
it hillich miel fan hemawoarst
en 't sillich slokje yn 'e kroech

in moai gleon frommes
streaket se efkes
oer de roungeare rêch

mar thús wachtsje
de opbakte ierpels
kâlde sûpenbrij
en 't hastich wiif

de ienûre bus fol boeren
krekt by de kij wei
op paed nei kij
praet oer kij

[p. 10]

Famyljepetear

justerjoun moete ik
in frou
yn 'e herberch

ûnder it tredde slokje
sei se:
jo lykje op pieter
en ik op 'e keninginne
sizze de minsken

dan sil ik mar
mem sizze, sei 'k

mar ik fyn it
net in komplimint
sei se
en ik allikemin

doe hawwe wy
mei in keninklik
gebaer mar in
rountsje jown