De Tsjerne. Jaargang 22

[p. 221]

[Nummer 6]

Oene Spoelstra / Trije oantinkens oan it gesticht

I

Wy sieten oan deselde tafel
hy en ik
en diene hop hop
trynke yn amearika
jantsje yn australia

wy hiene swéslach
hwant hy wie
de keizer fan china
nammentlik in broer
yn amearika
hie in fabryk.

Wy sieten oan deselde tafel
hy en ik
en seine oars net
as
dach mynhear
nacht mynhear

hwant hy wie
de keizer
fan china.

[p. 222]

II

It famke wreau trijeris
deis de doarren
mei in doekje
waenwiis
by elke doar trijeris
in heas lûd
sûnder triennen
hja hie in opdracht
hwant hja wie
in bern
fan god.

III

Yn it therapeutyske lokael
dounsen kleurde famkes
op in rychje
oan in toutsje
in wike
in libben lang.

Hja wiene de bern
fan de mynhearen
mei tearen
as oars wol tremoaren
oan hannen en fuotten
hongen hja
en wachten
oant mynhear foarbyried

dan waerd har plak
oan in oar forsein.