De Tsjerne. Jaargang 22

[p. 194]

Jan J. Bylsma / Gedichten

Bea

(oan oare dichters)

ik fiel wol jonges
dat myn ferskes
net botte jim
wurdearring ha

mar ik wit neat
fan dichtsjen mei de
hûd en weromkrûpe
yn 'e memmeskoat

de poëzij fan jim
troch ienfâld forljochte
wetter ha 'k hieltyd
sahwat roaid

myn fantasij is
sa biheind en lit
dat nou mar sa

flean út eigen
fearren fan fjûr
nei himelsfearen en yt
jim fûlbigearde manna

mar lit de kromkes
foar de mosken

[p. 195]

Melle populair

ta de bûsen
útskuord
sa hie 't west
melle wie wer
op syn bêst

fannacht wie 't
folle minder
wjirmen kroepen
út syn earen
slangen hied er
om syn kiel
tweintich tritich
gnomen mei helske
knyften woenen him
lobje

by it moarnsbrea
in grau en in snau
foar de bern
foar it wiif
sels dat net iens

in healûre letter
skuorden de
jan-pytknors alwer
ta de bûsen út
by melles earste bak

yn 'e koken thús
rôlle in trein
súntsjes
yn 't ôfwaskbakje

[p. 196]

Swier

hja hie 't
dy sawnde kear
net wold
mar hawar
har man
wie oars net
to brûken
en tankber
priizget se
de hear
dy't it al
regeart

[p. 197]

Unmacht

ik woe dat ek
om my in greate stilte
hinne woeks
en dat de stjerren
en de moanne
my ek yn in
great forbân
bihellen

mar ja ik moat
noch al myn
giro's skriuwe
branje helje
foar de kachel
en fan gryp
bin 'k ek net frij

jim moat mar
tinke minsken
dat ik it o sa
goed mien

[p. 198]

Huorrebuorren

yn dit greate
akwarium
sitte kilo's fleis
klear om nei 't
bal to gean

in modieus forsierde
slachterswinkel
hwer't mannen mei
de kraech omheech
lâns rinne oft se
de lêste trein nei 't
noarden noch
helje moatte

hwa't hjir nei
fiif à tsien minuten
wer bûten stiet
in lege mitrailleur
efterlitten op it
slachtfjild -
hat dy it
sa by jo
forballe hear
dat him dit
oerkomme moast

[p. 199]

Ald man

ik moat der net
oan tinke:
in stokje triljend
yn 'e hannen
op 'e jierdei
de bern en bernsbern
mei sigaren

in heale en
ast lije kin
in hiele mingel
foar elke dei
ien sûpke
wylst der krapoan
fiif en tweintich
út ien mingel gean

it geslacht
in hantsjefol
skronfels
en fortroud mei
de dea

[p. 200]

Komediant

mei myn taske
útstrutsen smoel
myn kreaze jaske
en eltse dei
skjinne sokken
spylje ik myn
rol net sa min

de wylde hierren
is er kwyt
seit jan-pyt knor

as ik mar gjin
hite jazz hear
gjin hearlike
skilderijen
en moaije
frouljusskonken
sjoch