De Tsjerne. Jaargang 17

[p. 30]

Beppe album

In skurve bân fan read flewiel
mei koperblikken blomfestoenen
en in slot dat net mear slút,
in album fol stive kartontsjes,
sarkjes, dêr't de dierbere deaden
brún-giel yn ûnderdûke:
froulju mei pelskes en strikjes
manlju mei snoarren en burdtsjes
foar de twade kear weireitsje.
Sa'n family-album wurdt mei 'er tiid
in adresboek fan deade Photographen.

In brune skym op goare eftergroun
is Beppe, ien fan in frjemd folk,
mar dochs jong op in pleatske by Wolsum.

Yn 1876 wie hja 20 jier.
De deaden fan de Russysk-Turkske oarloch
dronken noch wodka en ieten komkommers,
ear't hja foelen foar de Czaer.
Turken mei lange burden hoeden skiep
yn de flakten fan Anatolië
ear't hja foelen foar Sultan en Great-vizier.

Claude Monet siet to skilderjen, -
de tunen fan de Tuilerieën. -
wylst ús Beppe nei Snits ta ried
mei de feint op in krompanielen sjeas.
Paul Cézanne lei it antlit fêst fan Mr. Choquet
wylst hja yn Snits har troujurk kocht.

Dostojewski forkearde mei geasten yn Bad Ems
en syn dokter sei: - De dea is noch fier.
Beppe dronk bakswetter dat tilde fan de mikroben
en har dea wie ek noch fier.
Hja is stoarn yn har tachtichste jier.