De Tsjerne. Jaargang 13

[p. 224]

Frysk en frjemd:

't Koe maller...

It berneboek De mâlbroekmich fan Diet Huber, forline jier útjown by Drukkerij Laverman N.V., biheart ta de bêst forsoarge 50 boeken dy't - alteast neffens de troch de CPNB ynstelde jury - yn 1957 útkommen binne. Lykas bikend wêze sil hat de skriuwster sets ek de tekeningen, de lay-out ensfh. forsoarge.

It is foar de earste kear, dat in Frysk boek sa'n neffens Nederlânske mjitte moai hege bikroaning kriget. In jier of hwat forlyn krige wól Lyoeske (útjowerij Osinga, Boalsert) in earfolle bineaming fanwegen it stofomslach, makke troch Theo Kurpershoek, mar in folsleine bikroaning foar in Frysk boek is noch net earder foarfallen.

Friesisches jahrbuch

Ta gelegenheit fan it Greatfryske Kongres is ûnder auspiciën fan de Fryske Rie it wenstige Jierboek oftowol Jahrbuch útkommen, mei in great forskaet fan artikels op ûnderskaet wittenskiplik mêd. De Fryske Akademy, de Nordfriesische Verein für Heimatkunde en de Gesellschaft für bildende Kunst und vaterländische Altertümer in Emden hawwe yn de opset fan dit boek meiinoar oparbeide. Dr. Y. Poortinga fungearre as einredakteur, meiredakteuren wiene dr. E.O. George (Noardfryslân) en dr. Günther Möhlmann (Eastfryslân). Fan de ynhâld neame wy njonken in koarte bydrage fan dr. E. Obsen George oer de skilder Emil Nolde de opstellen oer Fryske litteratuer fan dr. Ernst Alker, dr. Y. Poortinga, dr. E. Obsen George, Peter Zylmann (de nijste eastfryske dichtkunst) en dr. Günther Möhlmann.

Ostfriesland (Zeitschrift für Kultur, Wirtschaft und Verkehr) joech yn it twadde nûmer fan 1958 gâns omtinken oan Westerlauwersk Fryslân. It bifette û.o. in geastige bispegeling, Traditionsreise nach Ostfriesland fan drs. S. van Tuinen, in opstel fan dr. Y. Poortinga oer Eeltsje Halbertsma en Eastfryslân en in gedicht fan prof. dr. J.H. Brouwer Praeludium mei oersetting yn it Platt fan Wilhelmine Siefkes.

Koart nijs

De hear Keimpe Sikkema, chef-redakteur fan de Ljouwerter Krante, is de hear L. Brandenburgh opfolge as foarsitter fan de Stifting It Fryske Boek. * De hear H.K. Schippers fan Drachten - tige huidige by syn ôfskie fan de Drachtster kweekskoalle doe't er mei pinsioen gyng - hat in sit krige yn de jury fan it Rely Jorritsmafouns as opfolger fan prof. dr. K. Fokkema.

FREARK DAM

[binnenkant achterplat]

Meidielingen

De fersen en it koart forhael oer Mata Hari yn dit nûmer binne resultaet fan in redaksioneel forsyk oan in rige skriuwers, om har réaksjes op dizze histoaryske figuer ris wer to jaen.

Oan Juff. J. van den Berg to Hilversum ús freonlike tank foar de eksklusive tastimming ta reproduksje fan Pyt van der Hem's skilderij.

DE REDAKSJE