De Tsjerne. Jaargang 13

Frysk en frjemd:

Yn de prizen fallen

As dit nûmer fan De Tsjerne forskynt, is de jierlikse útrikking fan de prizen fan it Rely Jorritsmafouns op it gemeentehûs to Mantgum wer efter de rêch. Fan de 22 ynstjûrde koarte forhalen binne fjouwer bikroand, nammentlik fan Hein Faber, Gerrit Mulder, Ype Poortinga en Piter Terpstra, allegear skriuwers dy't ek yn earder jierren yn de prizen foelen. De skriuwers fan bikroande gedichten

[p. 160]

(trije fan de sawntjin ynstjûrde fersen) binne lykwols nijelingen yn dit formidden: Tsjits Peanstra, Durk van der Ploeg en Jo Smit.

Rimen en teltsjes

De útjowers Osinga (Boalsert) en Van der Velde (Ljouwert) sille der foar soargje dat fan de Rimen en Teltsjes fan de bruorren Halbertsma in nije, sawnde printinge forskine sil. Dizze kear yn ôfleveringen, mei elkoar acht. De biwende printen fan Ids Wiersma sille wer foar de yllustraesje brûkt wurde en as tekstbiwurker docht ek nou wer, lykas by de foarige printinge, J.P. Wiersma tsjinst. De earste ôflevering sil plechtich oanbean wurde by gelegenheit fan de bitinking fan de hondertste stjerdei fan dr. Eeltsje Halbertsma.

Memmetael, mar gjin heitelan

‘Hoenear forskynt de Fryske roman dy't yn Hongkong, Grand Rapids of Adelaide spilet?’ Dizze fraech fan D.A. Tamminga (sjoch De Tsjerne febr. '58) hat de skriuwer Marten Apperloo opfette as in stille wink. Hy is dwaende mei it skriuwen fan in Fryske roman dy't de hjirboppe sitearre rigel ta motto hawwe sil. Apperloo, berne yn Ouwsterhaule, publisearre foar de oarloch al mei in oare ‘outsider’, B. Runia, in Fryske taelmethoade De memmetael yn it heitelân, destiids útjown by Van Gorcum. Sûnt hat er gâns romans yn it Hollânsk skreaun, gauris spyljend op it plattelân yn de Fryske súdeast- of súdwesthoeke (Als de heide bloeit, De nieuwe aarde, Marcus Ketsebol), foar in part mei itselde boobytrap-effekt fan Sjoerd van der Schaaf's Abbingawâld. Apperloo, dy't de lêste jierren yn Australië tahâlden hat yn opdracht fan it Nederlânsk regear, hat him nou wer yn Fryslân nei wenjen set. Syn earste Fryske roman sil yn Australië spylje, yn Frysk emigranteformidden.

Koart nijs

It forbyldingsspul yn trije tafrielen De Seinekeapman fan dr. Y. Poortinga en Barend van der Veen hat de earste priis woun yn in toaniel-priisfraech, útskreaun troch it Kristlik Frysk Selskip. * Mefrou Dj. Weening-Meijer hat in toanielbiwurking skreaun fan har roman Pleisterplakken. Opfieringen hawwe der west yn De Harkema en op It Surhústerfean. * It jannewaris-febrewaris-maertnûmer fan It Beaken, orgaen fan de Fryske Akademy, is útjown as huldeblyk oan de wittenskipsman dr. O. Postma, dy't yn maert njoggentich jier wurden is. * Om it oprjochtsjen fan in stânbyld yn 1960 mooglik to meitsjen, sil it Piter Jelles Troelstrakomité yn Fryslân slútsegels yn de hannel bringe neffens in ûntwerp fan S.L. Harz. * De K.F.F.B. sil dit jier in nije roman fan W. Cuperus Striid en Segen útjaen, dy't oankundige wurdt as de autobiografy fan dizze skriuwer. * Jiergong V nr. 1 fan it Saksysk tydskrift 't Swieniegeltje bifettet û.o. fersen en in forhael fan de Eastfryske skriuwster Willemine Siefkes. * De Nederlânske kritikus Johan Winkler sil op Beetstersweach in lêzing hâlde oer Kaj Munk en syn wurk. Dit mei it each op de kommende opfiering fan Munk's toanielstik Liefde yn it iepenloftthéater dêrre yn juny. Lyk as bikend wêze sil, is Winkler de man dy't it wurk fan de forneamde Deenske predikant-skriuwer-forsetsman yn Nederlân û.o. troch oersetting yntrodusearre hat.

FREARK DAM