De Tsjerne. Jaargang 13

[p. 96]

Frysk en frjemd:

‘De kloklieder fan de Sudeasthoeke’

De kloklieder fan de Súdeasthoeke is de ûndertitel fan de biografy fan Geart Lourens van der Zwaag, skreaun troch Sj. van der Schaaf. Dizze libbensbiskriuwing, dêr't jierren lyn ek al útjefteplannen foar bistiene, sil nou fan 't maityd - hjir en dêr omwurke - forskine ta gelegenheit fan de bitinking fan de 100ste bertedei fan Van der Zwaag, dy't op 4 maeije 1858 yn Wolvegea to wrâld kaem. Bihalven as politikus - foaroanman fan de Friesche Volkspartij, Keamerlid, lid fan Deputearre Steaten - wie G.L. van der Zwaag ek as Frysk skriuwer en foardrager bikend. Syn biografy sil opnomd wurde yn it útjefteplan fan de Wâldrige fan de Fryske Akademy.

Strikel en heitelan

Al strikeljend hat it nije moanneblêd De Strikel, de foarige kears yn dizze rubryk oankundige, der net foar kinnen dat lykwols ek It Heitelân, al mear as ienris dea forklearre, him op 'e nij opponearre hat. De Strikel - wy jowe efkes inkelde feiten omt de lêzers der oars ris yn wei wurde koene - is opnommen yn it abonnemint fan De Fryske Bibleteek en forskynt by Drukkerij Laverman n.v. to Drachten ûnder redaksje fan Hylkje Goinga, Freark Dam, Dam Jaarsma, Marten Sikkema en J.J. Spahr van der Hoek. It wer-berne Heitelân is oergien nei de útjowerij Het Witte Boekhuis to Boalsert (de bruorren Brattinga). It earste nûmer neamde noch gjin redaksje. Letter is bikend makke dat dy bistean sil út dizze trijekaert: T. Brattinga, Abe Brouwer en E.S. de Jong.

De Fryske bibleteek

Dr. Anne Wadman hat yn Het Vrije Volk in artikel skreaun dêr't er de bisteansmooglikheit en -winsklikheit fan De Fryske Bibleteek ûnder de tsjintwurdige omstannichheden kritysk ûnder eagen sjoen hat. It bistjûr fan dy foriening hat ûndertusken kundskip dien fan it nije útjefteprogramma foar 1958. Dat omfettet njonken De Strikel: in roman fan P. Terpstra (oersetting fan De einder is te ver, al earder yn it Hollânsk útkommen); in samling fan bikroande ‘sketsen’ (evt. ek gedichten) út de Rely Jorritsmapriisfragen 1956 en 1957; in oersetting fan dr. G. Dykstra fan de Yslânske Gunnlaugssaga.

Koart nijs

Us âldste nou libjende Fryske dichter dr. O. Postma hopet de 29e fan dizze moanne syn 90e jierdei to fieren. Wy biede him fan dit plak ôf as Tsjerne-redaksje ús hertlike lokwinsken oan. * It tydskrift Quatrebras liket wer út in soarte fan skyndea opstien to wêzen. It lêst forskynde nûmer bifettet in toanielstik fan Jelle de Jong Ien doar wie iepen, dat okkerdeis û.o. yn it Ljouwerter Kunstsintrum troch studinten spile is. * Fan D.A. Tamminga's Ballade fan it Spylske Hûs hat de bikende grafikus Nico Bulder in rymprint makke, dy't lykwols net yn 'e hannel komt. * Yn Omnibus, in Dútsk studinteblêd út Braunschweig, skreau de studint E. Badermann in artikel Entdeckungsfahrt durch eine Kultur, dêr't yngien wurdt op de hjoeddeiske Fryske litteratuer en kultuersituaesje.

FREARK DAM