De Tsjerne. Jaargang 12

[p. 360]

Liuwe Dykstra:

Dou

dou bist as in stjer
fierôf foar my
dyn wite ûnwittendheit
driuwt om dy hinne
yn wide en widere ringen
as wolkens om de sinne

forlerne strielen fan dyn moed
dynje stjûrleas foarby
om to brekken tsjin
iisbergen
chaotysk
lizze dyn foarmen bleat

skielk bist
in gleone sinne

Vreewyk (feestjoun iisklub ‘Drachten-Noard’)

hwerom net blier to laitsjen
mei dit weagjende folk
nou't it triljende feestgerûs
ûngrypber as in ingel
ûntwykt mei de reek
troch in sigende doar

de blidens fynt yn my
in bolwurk
jimmeroan ûnnimber
de fleur gounzet om my
as deade blêdden
yn in hjersttwirre

stompend dounsjen bûket
as in swypkjende rein
tsjin myn ruten
ûnsinnich hurd

hwerom
bliuwe myn ruten sletten