De Tsjerne. Jaargang 12

[p. 353]

[Nummer 12]

Sybe Sybesma:
Etude

de lêste treast: in moarnske sigaret;
deawurge eagen dy't net sliepe koene,
en tinzen: ‘mei gjin inkel lot forsoene’ -
it daget al, en it is fiersto let.

men lit jin net fan wanen mear bitsjoene,
dronken démonen dounsje in âld forlet;
de lêste treast: ien moarnske sigaret,
reekslierten dy't gjin stalte winne woene.

en yn 'e keamer spoeket wyld fenyn,
de muorren wurde swart, de boeken lêstich:
myn hertsear is oan ein, en sûnder fêstich-
heit swalkje ik tonei myn nachten yn.

ik leave dy, en dou bigearst my net -
ien lêste treast: in moarnske sigaret.

Amsterdam, 23 july 1957.