De Tsjerne. Jaargang 12

[p. 209]

Jo Smit:

Ballade fan de bolle

As jeugdich interbolle yn it lân
Sloech hertstocht troch him as in brân,

Doe't by de hikke, op 'e daem,
Hy in like jonge, och sa prûze kou fornaem.

Dy rjochte rêch, dat kante jaer
Rekken by him in tige teare snaer.

Nou is dat op himsels net abnormael:
De jonkheit wurdt faek lutsen fan in ideael.

To ier lykwols waerd er fan 't kouke skaet,
Fatael hat dat doe la kompleksen laet.

Hiel pynlik fielde er him frustreard,
Op de wize lykas Sigmund Freud dat leart.

Foringing fan biwitten op dy jonge kou
Taestte him nuver yn syn libido.

En hwat yn in kristen to priizgjen is
Hjit gauris by in stamboeksbolle hieldal mis.

Yn 't seksuéle libben bliuw ik monogaem:
Dat wie hwat dy bolle foar him naem

En hwat syn boer forskriklik stiek; mar neat
Koe meitsje dat er har, syn ideael, forgeat.

Sadwaende waerd er útkard foar de slacht;
Doe lykwols kaem de útkomst, staf oer nacht.

By in féarts-psychiater foun er baet
En oerdracht fan gefoelens op in apparaet.

Sa, troch it tweintichste-ieusk geny,
Hat er in kaei-posysje nou by de K.I.

[p. 210]

Forgunning

Né, ik forgun Sjoerd Spanninga
de folle freugde net fan 't skeppen,
noch Eeltsje Boates Folkertsma
it dreech en warber skreppen
foar Fryslân Frij.

Gjin Schurer en gjin Tamminga
forgun ik 't swijen noch it neamen,
gjin Fryske yntelligintsia
in Tsjerne fol mei dreamen:
kunst skeppe wy.

Ik wit, sa is it goed, hwant sa
bliuwt alles yn 'e running.
Stean my lykwols it rêstich rêsten ta
by in buordtsje mei ‘forgunning’,
dàt sinnicht my!

E.B.F.-Sonnet

Fjirtjin rigels telt elts goed sonnet
Oft it nou hwat apart is of gewoan;
As ik hjir nou in nije foarm fortoan
Reitsje ik perfoarst net oan dy wet.

Faeks freget ien: hwat docht dit fers
Ofsûnderlik bineamd to boek to stean?
Lokkigernôch is freegjen net forbean:
Kom rêstich by it kunstwurk sels op les.

Elts rym yn dit sonnet is manlik rym,
Rju ynfloed hat soks op 'e toan,
Tominsten foar it dichterlik bisef.

Stjert hjirby grif al twivels skym,
Mear komt it op it skema oan:
Abba cddc EBF EBF.