De Tsjerne. Jaargang 12

[p. 197]

Freark Dam:

Twatalichheit

In dauwjirm kaem by 't dei-lemieren
Ris by in keetfol hantsjemieren
Dy't wachten op 'e poepesinne
(Men wit hoe warber mieren binne)
Dy dauwjirm frege soun en sei:
Is hjir faeks noch famylje by?
Nou né, sei doe sa'n poepske mier,
Verdammt noch mal, was machst du hier?!
O just jawol, sei doe dy wjirm,
'k Ha my grif yn de staech forsind,
Hjir moatt' noch óare mieren sitte
Dy't op syn Frysk mychhimmel hjitte,
Twatalichheit is in tormint,
Sa is men miich, sa is men mier...

Halt's Maul mei dyn fordomd gekjirm,
Sa 'k sei, sei doe dy poep, was machst du hier?

Op in krusebeibeam

In rosbei en in hounbeistâl

Dy frijden yn de ûnderwâl

Hja beiden ros, hja beiden houn

Hja frijden los, hja frijden soun

En dêr't hja pearen bloeit nou fris

De krusebeibeam sûnder mis.

Op in foarpok

De foarpôk sit to âljen,

To âljen as in bear

Wy reizgje nei de froulju

Yn nachten wit hoe near.

Goendei myn foarpôk, goede wacht,

Farwol, oant noch in oare nacht

As yn syn bleate fleislikheit

De foarpôk yn de ruften leit.

[p. 198]

Groteske fan Hendrik de Vries

[p. 199]

WSBW

Wryt en Slyt en Bé en Wé
Dy dounsen de barcarolle
Hja dounsen sté, hja dounsen dré
Hja dounsen as in bolle
Hja dounsen oant de lêste stjer
Sa klûmsk wie as in kedde
Ta ûnbiskamsum folksbidjer
En doe kaem blauwe Fedde
(Net dy fan 't Fean; fan oare kusten)
Dy spriek har strang kâldgnyskjend oan.
Ta straf foar harren lusten
Biskikte er dat hja dounsje soene
Oant hja gjin proast mear sizze koene

En sa sjocht men - hoe't it jin ek spyt -
Gjin Bé en Wé ea sûnder Wryt of Slyt.

Horsey, horsey...

‘It hynder mei de kêddebek’ (fan Ype)
- En dan leafst yn fonétysk skrift -
Hat my to wrâld, to lij, to loevert
Méar hertsnju jown mei alle lek en brek
As alles hwat (hja meije lipe of pipe)
De Fryske skriuwerij sûnt Obe opjoech.
Bliuwe alle pipen fierder yn 'e sek,
Dat hynder mei de kêddebek (fan Ype)
Haw ik myn djipste Ik op slipe,
Haw ik myn sinnichst sin op set.
En sûnt, op elke set en pret,
Stek ik it glês út, swaei de swipe,
Oant ik it kwyt-wurd yn wanhopich lipen
Hwat ik yn djipste dream him opdroech:

Skielk, nei dy lêste, smelle stripe
Lûkt my dat hynder mei dy kêddebek.