De Tsjerne. Jaargang 12

[p. 45]

Fedde Schurer en D A. Tamminga:
Fearpikkende op 'e Parnassus
III

FEDDE SCHURER:

De iene is regisseur, de oare spylder,

Dizze is gast, jinge ierappelskylder.

Unhuere mûntsen hakje 't kleastertún

Wylst hill'gen meditearje op har pylder.

D.A. TAMMINGA:

Wé, hwa't syn lodde yn 'e fuorge goait,

Him op in Plein mei frjemde fearren toait!

Unnutte feint, hwerom dochs dyn talinten

Yn pronk en idelheit forrinkelroaid?

FEDDE SCHURER:

Bist dû ta sokken steile tael capabel,

O frjemdling yn Jeruzalem en Babel?

Torjocht hat dy dyn heit gjin bokje jown,

Wrokjende âldste soan út de parabel.

D.A. TAMMINGA:

Haw ik gjin bok, dou silst der noch fan dreame

Oan dyn trapeze yn dy merkekreame.

Toemar, salang ast dou dyn salto's draeist

Sil Jan Publyk dy duvelskunstner neame.

FEDDE SCHURER:

Ta spyt fan dyn ûnwiere antithese

Leaver in deafal dan fan myn trapeze

As, ûnder 't pseudonym fan Jan Krityk,

Stadich forgean yn hichte- en romtefreze.

D.A. TAMMINGA:

Bliuw dan mar draeijen om dy wrakke as,

Dysels forfrjemdzjende fan 't dichterras.

Hja sille sûnder dy de opflecht weagje

Djip ûnder har de sé fan Ikaros.

(wurdt fuortset)