De Tsjerne. Jaargang 10

Frysk en Frjemd:

‘It jier yn 't roun.’

De dichter Douwe Hermans Kiestra, fan hwa't oant nou ta mar twa fersebundels bikend binne (Efter it oargel en Sinne op 'e striesek, it lêste pubisearre ûnder de skûlnamme D. van Wieren), sil meikoarten (by Laverman yn Drachten) in nije bundel útjaen. It is in lytse, nije fersesyklus ‘It jier yn 't roun’. Uterlik sil hja in unikum wêze ûnder de Fryske fersebundels. By alle trettjin fersen ntl. wurdt in yllustraesje opnommen fan de Ljouwerter kunstner M.J. Walta, oant nou ta in frijwol ûnbikende figuer yn it lytse rychje fan Fryske grafisi, dy't mei dit wurk lykwols tige de oandacht op him festigje sil, as 't my net mist. Op himsels komt in neijer kontakt, liedend ta resultaten hwat de boekforsoarging oanbilanget, tusken skriuwers en byldzjende kunstners yn Fryslân grif net fan ûnpas. Yn dit forbân mei noch meidield wurde dat de bundel mei oersettingen fan de kwatrinen fan Omar Khayyam troch Inne de Jong, yllustrearre troch Martha Wadman, ek kommende weis is.

Hwat noch komme kin.

Heard op in Frysk wykwein yn Koartehimmen: Fiif Fryske skriuwers ‘fan it boppeste buordtsje’ hawwe elkoar plechtich ûnthjitten, elk foar oar fóar in fêststelde datum in roman skriuwe to sillen. Soks mei it each op it driuwend forlet fan gaedlike Fryske romanmanuskripten. Nammen binne my net bikend, mar dat is sa goed ek wol: in briedende hin moat net steurd wurde.

Hwat komme sil.

De nije útjefte fan de sjongbundel ‘Fryslân Sjongt’, dy't tarist wordt, sil gâns in rige nije Fryske lieten bifetsje, in foech tritich meielkoar. Gâns âldere sille dêrfoar it plak romje moatte. Meielkoar sil de bundel 128 lieten bifetsje. - De skriuwer P. Terpstra (‘De koperen slang’, ‘Tsien jier letter’) is fan doel, in Fryske roman to skriuwen, dy't yn Ljouwert spylje sil. - Abe Brouwer, S.J. van der Molen, D.A. Tamminga en P. Terpstra hawwe meielkoar yn opdracht fan it organisearjend komité in histoarysk tafrielespul skreaun foar de stêd Boalsert, dy't fan 't simmer it feit dat hja 500 jier lyn de stêdsrjochten krige mei greate feesten fiert. It stik hat as titel: ‘It rjocht sil stean’ en de première is op 14 July o.s. yn it nije iepenlofttheater to Boalsert.

F.D.