De Tsjerne. Jaargang 9

[p. 224]

Frysk en Frjemd:

De nije Reiddomprige.

De redaksje fan de Reiddomprige, bisteande út Marten Sikkema, Anne Wadman en ûnderskreaune, hat foar de nije jiergong fan de Reiddomprige, dy't by de Utjowerij Laverman foar de fyfte kear mei in seary boekjes komme sil, it neikommende útjefteprogram op priemmen set:

In samling fan njoggen koarte forhalen fan Marten Sikkema, ûnder de titel ‘De slach forlern’ sil de rige iepenje. Foar dit boekje, dat meastepart earder publisearre wurk bifettet, hat Joh. Koopmans de omslachtekening makke. - Nûmer twa wurdt it debút fan Tsjits Peanstra; har earste bundel, in lytse kar út har fersewurk, sil de titel ‘Underweis’ drage. - Nûmer trije is de novelle ‘Sûnder sûker’ fan Jo Smit, dêr't wy de foarige kear yn dizze rubryk al oer skreauwen. - de lêste jefte wurdt in oersetting dy't G.N. Visser makke hat fan in ier-sechtjinde-ieusk Portugeesk dokumint, in journael oer de ûntdekking fan Vera Cruz, útbrocht oan de kening. De titel is ‘Pindorama’ (‘Lân fan de palmen’); de skriuwer de Portugees Pero Vaz de Caminha. De oersetter sil in koarte ynlieding oan it eigentlike manuskript, dat earder al yn inkelde moderne talen oerset waerd, foarôfgean litte.

Roman oer Willem van Haren.

De romanskriuwer dr Y. Poortinga en de histoarikus ds J.J. Kalma binne rékommen mei de foarstúdzje foar de roman dy't earstneamde, mei help foar it histoaryske part fan ds Kalma, skriuwe sil oer Willem van Haren, de âldste fan de beide forneamde Fryske jonkers dy't as dichter, mar ek as politikus namme makke hawwe. It wurk fan beide komparanten fynt optheden gjin fuortgong, omt ds Kalma fan de Fryske Akademy opdracht krige hat foar it meitsjen fan in bibliografy fan de 17de en 18de ieu, mar bihalven mei de foarstúdzje binne hja ek mei de opset in stikhinne ré. It hiele avontûrlike libben fan de steatsmandichter Willem van Haren (berne 1710 to Ljouwert, forstoarn 1768), dat him bihalven yn Fryslân ôfspile hat û.o. yn St. Oedenrode en oan it hôf yn Brussel, sil yn dizze roman syn gerak krije, is 't doel.

Koart nijs.

De dissertaesje fan Anne Wadman (oer Hjerre Gjerryts van der Veen en syn tiid) sil by rékommen útjown wurde by de Utjowerij Laverman N.V. - De nije roman dy't de skriuwster Ypk fan der Fear, neffens har sizzen op it lêste Tsjernesymposion, ûnder hannen hat, sil it Joadeprobleem ta ûnderwerp hawwe. - Ynpleats fan it orgaen fan de litteraire ‘jongerein’ De Golle, hat in moanneskrift ‘Quatrebras’, ûnder redaksionele lieding fan Marten Brouwer, Sybe Sybesma en Bert Mulder, it ljocht sjoen. - De Utjowerij van Gorcum to Assen hat ds H.J. Brouwer opnij opdracht jown ta it forfryskjen fan in ‘bibelboekje’; dizz'kear ‘Hosanna to the King’ fan Muriel Chalmers.

FREARK DAM.