De Tsjerne. Jaargang 9

[p. 193]

[Nummer 7]

E.B. Folkertsma:
Koartom (IV).

It bêste birou fan 'e sûnde is blydskip yn God.

* _* *

It antlit fan 'e minske is oanlein op 'e laits.

* _* *

Yn twivel dwêst gâns leafde.

* _* *

Haw my leaf, o myn God, my dy't Jo net leafhawwe kin.

* _* *

It libben is sa skriklike komysk, dat it sûnder hwatte tragyk net to fornearen wêze soe.

* _* *

Panta rei? Alles dounset (skreaun Pinkster 1922).

* _* *

Hwat yn minsken útlake wurdt, is it bern.

* _* *

Hoenear is immen âld wurden? Hwannear't er net mear leafhat.

* _* *

Hwer leit swierder forfeling as oer it forlitten perron fan in stasiontsje op in neare simmerneimiddei?

* _* *

De bêste kristen is dy't bêst mei lytse bern omgean kin.