De Tsjerne. Jaargang 9

[p. 96]

Frysk en Frjemd:

‘La brillante evoluzione....’

Yn it fyfte diel fan ‘Storia Universale della Letteratura’, in mânsk en wiidweidich wurk dat in oersjoch jowt fan de hiele wrâldlitteratuer, hat de skriuwer, dr Giacomo Prampolini, gâns omtinken jown oan de litteratueren fan de lytse taelgebieten. Sa kriget de Fryske skriftekennisse yn dit diel, dat yn 1951 to Turyn útkommen is, net minder as tsien blêdsiden. Foto's binne opnommen fan Simke Kloosterman, R. Brolsma, dr O. Postma, Fedde Schurer en D.A. Tamminga. Op side 493 seit de skriuwer, de Fryske skriftekennisse hat yn in mennich decennia in skoandere ûntjowing (brillante evoluzione) trochmakke; hja fortsjinnet ûnder de lytsere Germaenske litteratueren hjoeddedei bysûndere bilangstelling.

‘Tevreden noch ontmoedigd....’

En prof. dr J.H. Brouwer hat yn in lêzing okkerdeis foar de Maatschappij der Nederlandse letterkunde to Amsterdam forklearre, oer de Fryske litteratuer ‘tevreden noch ontmoedigd’ to wêzen. Hy woe hawwe, hja koe hwat mear élan skoan forneare, ek noch hwat mear djipte en suggestive forbyldingskrêft, en dan hwat minder konvinsje. It is noch in toer, ûnder de mannichte fan Fryske dichters hjoeddedei talinten oan to wizen, sa sei de professor fierders noch.

Nijs rounom wei.

Fedde Schurer hat, lykas prof. dr P. Boendermaker en ds Okke Jager, in priis woun foar in Nederlânsk fers oer de Bibel. It Ned. Bibelgenoatskip hie dêr in priisfraech foar útskreaun dêr't 145 ynstjûringen op ynkomd binne. De tekst fan de fersen sil publisearre wurde op de Bibeldei op 16 Juny yn Den Haech. - Tagelyk mei it forskinen fan Sjoerd Leiker syn roman ‘De Voorspelling’ is troch de útjower, De Bezige By, oankundige, Leiker hat noch in roman ûnder hannen dy't ‘De Grime Herne’ hjitte sil en ek spilet yn de Fryske Wâlden. - Dit foarjier sil yn de Arbo-seary ûnder de titel ,De Zandduivel’, de troch J. Dykstra forsoarge Nederlânske oersetting fan Abe Brouwer syn roman ‘De Sânduvel’ forskine. It is yn it Frysk yn boekfoarm noch net forskynd, mar stie neist in jiermennich as feuilleton yn Frysk en Frjj. - Marten Sikkema sil, yn de Reiddomprige, in bundel fan syn bêste koarte forhalen útjaen. De titel sil wêze: ‘De slach forlern’. - Yn de 117de jiergong fan De Gids, dy't nou wer by Van Kampen forskynt, sil yn forfolgen in roman fan Marnix Gijsen: Er gebeurt nooit iets, pleatst wurde en fierder fragminten út in deiboek fan Slauerhoff. - Yn Het Vrije Volk is okkerdeis oankundige, yn de jiergong 1954 sil Anne Wadman artikels skriuwe oer de opkomst fan de arbeidersbiweging, en dr Fokke Sierksma oer ‘Sociologie en Friese Beweging’ en ‘Friezen en Navalo-Indianen’. - Gerrit Borgers hat fan de Jan Campertstichting opdracht krige, in stúdzje to skriuwen oer Paul van Ostayen.

FREARK DAM.