De Tsjerne. Jaargang 8

[p. 256]

Feysk en frjemd.

Nije printinge ‘De Gouden Rider’.

Ta gelegenheit fan de o.s. Fryske Boekewike, dy't op 30 Oktober iepene wurdt, sil der by Utjowerij Laverman N.V. to Drachten in twadde printinge forskine fan de fersebundel ‘De Gouden Rider’, dêr't de dichteresse Rixt de Gysbert-Japikspriis 1953 foar takend krige hat. De earste printinge, forline hjerst forskynd, wie noen in útjefte fan Kamminga to Dokkum, hwaens fûns troch de Drachtster útjowerjj oernommen is. In opmerklik sukses hat dizze útjefte, al fier foar't de priis takend waerd dus, hawn: binnen in jier wie de oplaech fan tûzen eksimplaren útforkocht. Al hat it feit, dat de bundel yn it abonnemint fan de Fryske Bibleteek opnommen wie, der sines ek oan dien fansels. - By deselde útjowerij forskynt dizze hjerst û.o. in nije (twadde) printinge fan ‘De Skarlún’ fan Reinder Brolsma.

It Heitelân oer ‘oergong en ôffal’.

Yn de wenstige Fryske Kronyk fan It Heitelân, sûnt koart wer forsoarge troch P(iebenga), wurdt klage oer it tokoart oan ‘fortellers’ yn de hjoeddeiske Fryske skriuwerswrâld. ‘It hat yn de healewize sitewaesje, dêr't wy yn forkeare, gjin sin en jow de krityk sa'n lûde en bylkerige kâns. Dêr't it boartsjen jitte leard wurde moat, kinne de spulrigels tonearsten better binefter hâlden wurde. Oan it rispjen is it jit lang net ta, dat lit ûnkrûd en weet salang yn 'e goedichheit bistean’, seit P. en dêr wol er ûnder oaren mei sizze, dat ‘it in griis is dat mannen as S.P. Akkerman, S.M. van der Galiën en P. Terpstra op it Hollânsk oergien binne’. - Fan de Fryske journalist P. Terpstra komme der meikoarten by Bosch en Keuning wer twa romans út, ien oer de Urker fiskers yn Argentinië en in lytse roman ‘De kleine residentie’.

Boeken yn Denemarken.

Offisiële sifers wize út, dat der jiers yn Denemarken sa likernôch 3500 boeken útjown wurde, mei in oplagesifer fan trochinoar 5235 eksimplaren. Oplagen (foar belletry uteraerd) fan 20 oant 50 tûzen rinne der nammers ek genôch ûnder. Alle trjje sifers wize derop, dat de Denen echte lêzers (en boekekeapers) binne.

Film neffens boek fan Hemingway.

Nei't jierren lyn For Whom The Bell Tolls al forfilme waerd, sil Metro Goldwyn Mayer nou gear oer in forfilming fan ien fan de bêste boeken fan Ernest Hemingway fan de lêste tiid: The Old Man And The Sea.

Koart boekenjjs.

Fan Theun de Vries sil meikoarten (by Van Loghum Slaterus yn Arnhim) in nije roman forskine: Pan onder de mensen. - Fan de bikende notaris Nanne Ottema to Ljouwert is útkommen in hantboek oer ‘De praktijk van het porcelein verzamelen’, mei û.o. 79 siden foto's. - It Amerikaenske State Department fiert ûnderhannelingen mei Amerikaenske útjowers om foar trjje miljoen dollar boeken nei de Philippinen to stjûren, by wize fan ‘tsjingif’ tsjin de goedkeape kommunistyske boeken dêrre. Foar û.o. Egypte en Indonesië bisteane soartgelikense plannen.

FREARK DAM.