De Tsjerne. Jaargang 8

[p. 17]

Fedde Schurer:
Trije gedichten.

Horloazjes.

Horloazjes, wekkers, staesjefolle klokken
De Lemstertoer, de Munt en de Big Ben
Slagge de tiid oan greate en lytse brokken
Tiktak, bimbam, foarby, toloar, forlern -

Us libben wurdt yn sifergroepen fong'en
Alf fiif-en-fyftich neffens K nul 2
En amper is de hoarn toplak wer hongen
Of 't is oan seis- en sawn-en-fyftich ta.

Tiid hâldt gjin skoft, dû silste en dû moatste
En time is money lyk it sprekwurd seit
O God, lit alle klokken hommels boarste
En rêd ús út de aktualiteit.

Horloazjes, wekkers, staesjefolle klokken
Big Ben en Munt en Hearrenfeanster toer
Hja hâlde ús noch mei lijen yn 'e stokken
Ien treast: ek dit, ek dit giet ienkear oer.

Noch tikje hja nerveus of bounzje heftich
Rop net to ier, it is safier noch net
Ik wit - mar skielk wurdt, sakelik en deftich
Dy hiele bringst yn de ivichheit bilet.

De mosk.

De mosk yn 'e moudige reedtsjes

Is gjin dei fan syn fretten wis

Mar gjin ien fan dy skiere proleetsjes

Dy't by God forgetten is.

Forjow my, myn freonen en sibben

Mei jim soarch en alwittend forstân

Dat ik yn dit fûgelfaei libben

My formeitsje as in mosk yn it sân.

[p. 18]

Adam yn ballingskip.

Adam, glûp de wegen del
Lit de tractor effen lins ha
Wyn dy troch it grien strewel
Displaced person, nei de grins ta
Jow it oan gjin skepsel wurd
Ek net oan dyn oare helte
En as de ingel mei it swurd
Efkes doddet op 'e jelte
Steur him dan net yn syn dream
Kypje oer syn skouder hinne
Dêr't de jimmer griene beam
En de libbenswetters binne
En dyn siele sil wearkenne
Oan syn langstme as klearst biwys
't Earste, iene, lang forlerne
Ivich sochte paradys.