De Tsjerne. Jaargang 8

[p. 5]

G.N. Visser:
Treursang.

Carlos Guido y Spano.^*)

Yn swietlûdich guaraní
Treurje by de harpe songen
Teare wurden en in jonge
Paraguayaenske út'ret dy
Yn swietlûdich guaraní

Skriem, o skriem urutaú
Yn it leaf fan de yatay
Dien is 't, dien mei Paraguay
Dêr't ik berne bin as dû
Skriem, o skriem urutaú

Yn it stille Lambaré
Wenne ik lokkich yn myn klinte
Oarloch kaem en grúzleminte
Alles hwat oerein stie, wé
Yn it stille Lambaré

Heit en mem, myn bruorren, och
Alles ha 'k forlern op ierde,
Bitter moat myn herte bliede
Pinen flymje it troch en troch
Heit en mem, myn bruorren, och

Under in griene ubirapitá
Sliept myn feint, dy't as in helt
Stie by Timbó yn 't kriichsgewelt
Nou sliept er, hwer't s' him bêdde ha
Under in griene ubirapitá

*) Argentynsk dichter, 1827-1918.
urutaú = tige swiet sjongende fûgel.
yatay = palmbeam.
tipoy = wyt klaed fan de Paraguayaenske froulju.

[p. 6]

 

'k Ha myn tipoy stikkenskuord

 

Oars net as ta roujen willich

 

En op dit grêfsté djûr en hillich

 

Knibb'lje en skriem ik jimmerfuort

 

'k Ha myn tipoy stikkenskuord

 

 

 

Woeste negers daet him ha

 

Nea woe er bûge en birêste

 

Wieken wy, hy wie de lêste

 

By Curuçú en Humaitá

 

Woeste negers daet him ha -

 

 

 

Hwerom, himel, biswiek ik net

 

Doe't er my triomfantlik dy

 

Blide deis nei Curupaytí

 

Triuwde oan syn soldatehert?

 

Hwerom, himel, biswiek ik net?

 

 

 

Skriem, o skriem, urutaú

 

Yn it leaf fan de yatay

 

Dien is 't, dien mei Paraguay

 

Dêr't ik berne waerd as dû

 

Skriem, o skriem, urutaú.