De Tsjerne. Jaargang 7

[p. 207]

Tsjits Peanstra:

Leste trein.

De lêste trein
rydt troch de nacht.
Earne sil dochs de ein wêze
hwer?
Earne wachtet immen
hwa?

Yn 'e nacht
op it forlitten perron
wurde ljochten lytser
eagen?
wurde lûden wei
stimmen?

Bea.

Jow dyn strielen o sinne!
Sjoch dit lichem:
It fel is ronfelich en toar,
de boarnen hawwe nea fol west
en witte net hwat leafde is,
de mûle hat longere en wachte
mar bleau in blom
dy't nea bisproeid waerd
- en wachte -

Moarns riisde it ljocht oan 'e kym
en jouns forsonk it. -
O, gouden sinne
dat yn dyn strielen
alles jit ienris jong
ienris bern wurde mocht!