De Tsjerne. Jaargang 7

[p. 131]

Geart Jonkman:
Faits accomplis....

Ik bin de fleaner fan 'e skimerjoun
De motor hat de wolkens hommels foun
Mar ringen rint de wizer al tobek
En sûnder brânje stean 'k wer op 'e groun.

Ik bin de meaner fan 'e twadde sneed
En foar myn dwaen wol aerdich op 'e g'leed
Mar as ik even nei de bûsdoek taest
Sjongt skean foar my in seine, nij en wreed.

Ik bin de lêzer fan it oarde diel
Ik bin de haedpersoan, de nomm'le siel
Mar 't is jit om in side as hwat to dwaen
Dan stjer 'k as offer oan it kâlde stiel.

Ik bin de rinder fan de lêste post
Ik kom fan hoop en freze oan 'e kost
Mar as my aenst de tas fan 't skouder glydt
Haw ik in oar en net mysels forlost.