De Tsjerne. Jaargang 6

[p. 257]

D.A. Tamminga:
Siesta op Jakle-Set.

Yndrôf is de kronyk fan Jakle-Set.
In krúspaed ienris foar dy't foer en gong.
In ealman hie oan dizze fjouwersprong
In tolhûs foar syn eigen bûse set.

In oare ealman waerd it plan forret.
Hy die de earste ealman ûndergong.
Nou rêste beide by de fjouwersprong.
It is it âld forhael fan Skier en Fet.

En ik, dy't hjir yn 't hege simmerg'ers
Fiif ieuwen letter fan 't forline dream,
Wit dat ik nea fan twaspjalt net genês.

Deselde séwyn haffelt oan in beam
Mar bringt de trie fan 't âlde riedsel net.
Yndrôf is de kronyk fan 't eigen hert.