De Tsjerne. Jaargang 5

[p. 190]

U.J. Boersma:
Draverije.

In krânse fan fleurige minsken
Om 't romme midfjild,
Boeijend fan ûnforwachte kleuren:
Palet-fantasij!
Pikeurs: kante kop út 't clowneske
Bûnt-wyt fan har dracht,
Rinn' er, efkes swipe-giseljend,
Meiïnoar smûzjend
Of blier gekjeijend tsjin in fanke.

Hja litte de hynsders losrinne,
De glânzjende, weagjende
dravers, mei de libbene eagen,
de fine noasters, de heech-ranke
poaten, dy't de baen ôflizze
yn Arabysk-lichte draeftrêd.

Dan, as it bellelûd tingelet,
Alles yn aksje:
Pikeur: grimmitich, spand de spieren,
Driuwt mei de leije
Syn wil it hynsder yn, dat pûstend
Moude-wolkens opslacht;
Roeden omfleanend 'e bochtpeal: taktyk
fan 'e tûke pikeur!
Swipe omheech hellet er d' ein 't earst!

Dêr keart er it switbiskomme hynsder.
Hymjend heart er 't hângeklap
Dat elts foar him hat lâns 't eare-roun!
Hy fûstket mei opteine kenners -
De draver, dy't woun, deawurch,
Siket fansiden nei gers....