De Tsjerne. Jaargang 5

[p. 120]

Fedde Schurer:
Analfabeet.

As de lêste freon strak by dy weigiet
oan de grize grins fan sé en lân
fynst' in skeamle koopren munt yn 't sân
dy't de floedweach tusken 't séwier neiliet.

Alles hwat dy bleau by libbens útein -
liz it yn it holle fan dyn hân
sjoch dit lyts talint, dit taestber pân
weardleas as it is en grienich útslein.

Wurden bin der net mear op to lêzen
mar it draecht it simpele motyf
fan in inkelfâldich hieroglyf
de eigen rune, 't hanmark fan dyn wêzen.

Hast, fan dat dyn dei yn 't oanbigjin wie
oeral net yn 't sân dit teken set
en omdôch nei syn bitsjutting ret?
lit it - inkeld God wit oft it sin hie.