De Tsjerne. Jaargang 4

[achterplat]

Frysk en frjemd:

Nij wurk.

‘Jolm’ wie it lêstforskynde dieltsje fan de ‘Reiddomprige’ dêr't oant nou ta de wichtichste Fryske moderne poëzij sant de bifrijing yn forskynd is. Dizze rige sil nou fuortset wurde troch Utjowerij Laverman to Drachten. Foar dit jier steane op 'e list ‘Reedridder’, novelle fan Anne Wadman, ‘Untwyk’, fersen fan Klaes Dykstra en ‘Núnders’, koarte gedichten fan Sjoerd Spanninga. Fan de lêste sil tige meikoarten yn de Fryske Bibliotheek in bundel ‘Spegelskrift’ yn 't ljocht komme.

‘Hessel Ypma’ is de titel fan P. Akkerman syn nije roman, dy't meikoarten forskine sil by de fa. Kamminga to Dokkum.

Rubryk: samle wurken.

In poëet hwaens dicht-ier (sa goed as) opdroege is, giet A.D. 1949 oer ta it útjaen fan syn samle wurk - oft der fraech nei is of net. Diskear is it Ed. Hoornik dy't syn wurk by elkoar swile hat yn ien boek.

Effen oars leit it lân mei it samle wurk fan Dr. Menno Ter Braak, dat yn 10 dielen forskine sil, dy't net allinne syn yn boek- of brosjure-foarm útjowne (en sa goed as allegear útforkofte) wurke bringe sille, mar ek in great tal jit net yn boekfoarm forskynde kroniken. De Amsterdamske útjower Van Oorschot docht hjirmei goed wurk!

Itselde kin sein wurde fan de nije útjeften fan it wurk fan Du Perron, dat de Utjowerij Contact forsoarget. Oant nou ta is al forskynd de greate ‘anti-roman’ ‘Het land van Herkomst’, wylst û.o. Du P. syn Multatuli-biografy ‘De Man van Lebak’ oankundige is, alles fan Du P. sels foar de nije printinge jit taret.

Dichterkeur.

Dr. W.L. Brandsma, ek yn Fryske litteraire rounten gjin ûnbikende, hat in ‘keuze uit verzen dezer eeuw’ dien, dy't ûnder de namme ‘Dichterkeur’ en forsjoen fan ynlieding en oantekeningen it ljocht sjen sil by de útjower Stafleu yn Leiden. Deselde útjower sil noch in oare ‘dichterkeur’ forsoargje, ntl. in fan Anne Wadman samle bundel Fryske gedichten mei Hollânske oersettingen, ynlieding en oantekeningen: ‘Frieslands Dichters’.

Konsintraesje fan wykbledden.

‘Frysk en Frij’ kundiget oan dat it tonei forskine sil as jefte fan de Stifting ‘Je Maintiendrai-Friesland’ en dat it ‘Nieuw-Friesland’ yn him opnomd hat.

Der giet noch altyd praet fan, dat de ‘Groene Amsterdammer’ en ‘Vrij Nederland’ in houlik oangean sille, mar men liket net rjocht út 'e rie komme to kinnen.

FREARK DAM.

Ynkommen tydskriften.

Nederland-Polen, Maandblad ter Bevordering van de Economische en Culturele betrekkingen, 3de jiergong, nû. 1, 2, 3.

All Liamm Tir na n-òg, tydskrift foar Bretonske Kultuer, Jann.-Febr. 1949 (nû. 12-13).

De Vlaamse Gids Algemeen Maandschrift. 33ste jiergong nû. 1.

De Gids, 112de jiergong nû. 1.