De Tsjerne. Jaargang 3

[p. 352]

Frysk en frjemd.

Stimmen ut Oxford.

By Osinga to Boalsert sil as útjefte fan de Fryske Akademy forskine in wurk fan de Ingelske taellearde dr. A. Campbell: ‘Gysbert Japicx’, mei as ûndertitel: ‘The Oxford-texts of four poems’, dêr 't de op 'e bibleteek fan Oxford oanwêzige teksten fan Sjolle Kreamer in Tetke, Nyschierige Jolle in Haytse-yem, Reamer in Sape en Egge, Wyneringh in Godsfrjuen yn bihannele wurde.

Yn ‘It Beaken’ skreau Sir William A. Craigie, ek fan Oxford, okkerdeis in opmerklike stúdzje oer ‘English and Frisian’.

Frysk en Hollansk.

To Drachten gie de première fan it troch juffer T. Landmeter for-fryske toanielstik fan Herman Heyermans: ‘Brand in de Jonge Jan’. Spilers wiene ‘De Jounpraters’ ûnder lieding fan Lammert Popma.

Mei it oarspronkelike stik, dat yn 1903 skreaun waerd, hat binammen de forneamde Henri de Vries triomfen fierd.

Podium set troch.

Nettsjinsteande alle sombere foarsizzingen hat it literaire tydskrift ‘Podium’ de holle boppe wetter hâlde kinnen, al wurdt it dan ek tonei troch Utjowerij ‘De Driehoek’ to 's Graveland forsoarge. De redaksje bistiet nou út Fokke Sierksma, Paul Rodenko, Gerrit Borgers, Wim Nagel en Simon Vestdijk.

‘De brand.’

Simon van het Reve, dy't mei ‘De Avonden’ sa'n (kwea-?) namme makke, is rékommen mei syn twade boek, dat ‘De Brand’ hjitte sil. Van het Reve skreau dit wurk yn opdracht fan de regearing(!), dy't ‘in roman, spyljend yn in Amsterdamsk milieu ûnder it regear fan keninginne Wilhelmina’ frege.

Oer regearingsopdrachten sprutsen: Anne Wadman is dwaende mei it útarbeidzjen fan in opdracht fan 'e foarige minister fan ûnderwiis: in blomlêzing Hollânske oersettingen fan Fryske poëzij sûnt Piter Jelles.

‘La peste’ op 't toaniel.

To Parys wurdt in opfiering jown fan in toanielbiwurking fan de forneamde roman fan Albert Camus: ‘La Peste’. Jean-Louis Barrault en de skriuwer sels hawwe de regy.

De Roomsk-Katholike tsjerke hat de wurken fan de foarman fan it existinsjalisme, Jean-Paul Sartre, op 'e Index pleatst.

FREARK DAM.