De Tsjerne. Jaargang 3

[p. 288]

Frysk en frjemd.

Fan de freonskip.

It wie to forwachtsjen, dat net allinne ‘De Tsjerne’ har opmeitsje soe om Fedde Schurer syn jierdei to fieren sa't dat freonen foeget: ek gâns oare blêdden en tydskriften (‘Nieuw Friesland’ en ‘Tijd en Taak’ û.o.) hawwe swart op wyt fan harren wurdearring bliken jown. Mar wy leauwe net dat wy fier mis binne, dat de skriuwer suver it wiiste west hat mei it album amicorum, dat in tweintichtal konfraters gearstald hiene ûnder de namme ‘Middei-jefte’. It boekje waerd op de 25ste July oan de jubilaris oanbean en bifettet bydragen fan: F.J. Bergstra, (prof. dr.) J.H. Brouwer, Gerben Brouwer, Freark Dam, (dr.) B. Dykstra, E.B. Folkertsma, Inne de Jong, J.D. de Jong, (kart Jonkman, Gysbert Koelstra, Jan Piebenga, Y. Poortinga, Sj. van der Schaaf, Marten Sikkema, M.K. Scholten, Sjoerd Spanninga, R.P. Sybesma, D.A. Tamminga, R.W. van Tuinen, Anne Wadman. Last but not least: de kunstner mei drukinkt en (simili-japon) papier, de hear J. Kamminga fan Dokkum, mei hjir net forgetten wurde. De útfiering fan it boekje is wer bard op in wize, dêr't hy allinne yn Fryslân it geheim fan skynt to hawwen. Jehs. Mulders sierde it gehiel op mei in pear vignetten. De oplage is lyts: 100 nûmere eksimplaren. Faeks binne der noch in stikmennich to krijen. Adres: G. Koelstra, Jachthavenstrjitte 3, Snits. Kosten f 7,50.

In tasizzing neikomd.

Foarich jier by de útrikking fan de Gysbert-Japikspriis oan dr. Obe Postma joech de útjower Brandenburgh to Snits de jouns oan de itenstafel to kennen, hy wie fan doel it samle wurk fan dizze nestor fan de Fryske poëten út to jaen. In oarderingskommisje, bisteande út de hearen F. Schurer en J.H. Brouwer, hat okkerdeis yn in folder it publyk oantrune, op dizze útjefte yn to tekenjen. Sa't nou liket, sil it wurk der komme. Lit dat alteast net oan ‘it publyk’ lizze!

It siket om de ein

mei de Hollânske litteraire tydschriften ‘Ad Interim’ en ‘Podium’, sa fornijt ‘Het Parool’. Faeks komme der fan beide noch in pear ôfleveringen, mar dan hâldt it ek op. Tagelyk sil bisocht wurde om, yn neifolging fan Flaenderen, to kommen ta ien great Nederlânsk litterair blêd. Wy freegje ús ôf: hwer moat men mei de hearen redakteuren hinne?

Ynkommen boeken.

Jan Eisinga, strider en dichter. In bondel poëzij en proaza. Drukkerij Laverman N.V., Drachten, 1948.

Roel van der Zee: ‘Lutske' jonge’, Brandenburgh & Co., Snits, 1947.

F.D.