De Tsjerne. Jaargang 3

[p. 262]

D.A. Tamminga:
Strophen foar myn soan.

Flok ús net mei dyn mûle
Fynst' aensen in forwyldre tún,
Hearst' oer Jeropa's nachtlik pún
De kleirop fan de ûle.

Moatstû dyn brea ek dope
Yn triennen, hâld op dit âld hiem
In trouwe nachtweits en biskriem
Us grêf net sûnder hope.

Swij folle en diel dyn tekken
Mei hwa 't forklomje yn wrâld's leed,
Mar klaei dy net yn 't narrekleed
Fan bylkerich skarlekken.

Rin net mei eltse kliber,
Skeaneagjend nei hwat ierdske bút. -
Giet aenst de reade stoarmbal út
Oan Seine, Thames of Tiber,

Span om dyn tromme it krip
En sjong net mei yn lûde koaren.
Myn soan, nim dizze wei, gjin oaren:
Oanfurdgje it frjemdlingskip.