De Tsjerne. Jaargang 3

[p. 222]

Gerben Brouwer:
Ienkear, as alles stil is -

Ienkear, as alles stil is,
Bliuwt inkeld noch in liet,
Dat sûnder wize en wil is,
Sadat it sêft forgiet.

Nea wie in hert sa skruten
As foar de greate sliep:
De nacht taest oan de ruten.
- De rôver en it skiep. -

Der hat in griene miede
Under de stjerren lein -
Himel, hwer is dyn ierde,
Ierde, dyn himel tein?

Der is in rôver kommen.
It wetter fan 'e saed
Is út myn biker nommen -
Mar oer in tsjuster paed

Komt troch it fjild de Hoeder
Fan alle minskebern:
De kweaden en de goeden
Binn' yn 'e nacht forlern.

Hy komt en bringt oan beide
It brea en de reade wyn.
- Der wie in griene weide,
Dêr songen de fûgels yn -

De mar hâldt op fan blinken:
It ljocht dreau út 'e dei.
In harp hold op fan klinken.
Der is in dichter wei. -