De Tsjerne. Jaargang 3

[p. 128]

Frysk en frjemd.

‘Van oude en nieuwe schrijvers’....

De N.C.R.V. skynt ek - tafallich krekt yn de tiid dat de Regionale omroppen op it harspit kamen - op 'e gedachte komd to wêzen, dat der in Fryske literatuer bistiet. Dat yn 'e rubryk ‘Van oude en nieuwe schrijvers’ liet hja de Fryske foardrager Sipke Tamsma fan Kollum op 13 Febrewaris in fragmint út ‘Siderius de Granaet’, in allang útforkoft berneboek fan Abe Brouwer, foarlêze. It sil ús nij dwaen hoenear't hja Fryslân wèr de gunst jowt. Hopelik wurdt der fan mear smaek, fan mear kennisse en earbied bliken jown!

Simson yn Amersfoart.

Ta gelegenheit fan de Nasjonale Feestdei (5 Maeije) sille to Amersfoart (Birkhoven) opfieringen jown wurde fan de Hollânske oersetting fan Fedde Schurer syn ‘Simson’. Mei de regy is û.o. bilêste Ludzer Eringa. P. Folkertsma wurket oan nije muzyk foar dit drama.

Folkertsmaiana.

Under de titel ‘Muziek in Friesland’ jowt R.J. Sipkens in tige wurdearjend artikel oer P. Folkertsma yn ‘Mens en Melodie’ fan Maert 1948. Hjiryn wurdt fornijd dat der yn April in radiokonsert hâlden wurdt wijd oan wurken fan dizze Fryske komponist. It sil dirigearre wurde fan Hugo de Groot, dy't as gastdirigent fan 'e L.O.F. yn 'e kunde kaem is mei de ‘Jonkerboer’-ouverture en dêr greate biwûndering foar hie.

Jubilearjende dichters - samle wurken.

C.A.J. van Dishoeck, Bussum en A.A.M. Stols, Den Haech sille de samle wurken fan A. Roland Holst útjaen yn forbân mei dy syn sechtichste jierdei yn Maeije o.s. Der komme 2 dielen gedichten en 2 dielen proaza. It earste sil noch yn Maeije útkomme. Ek Jan Greshoff sil ‘bundelje’, by van Kampen en E.M. Querido (Amsterdam) yn twa rigen fan fiif dielen. Yn de earste forskine ‘Gedichten 1907-1947’, ‘Legkaart’ (aphorismen en opstellen oer poëzij), ‘Zwanen Pesten’ (boutaden), ‘Grensgebied’ (opstellen) en ‘Het boek der Vriendschap’. De twade rige bifettet ‘Bereisde Roel’ (reisnotysjes, ensafh.), ‘Eerbare Voorstellen’ (letterkundige essays), ‘Het boek van herdenking’ (persoanlike oantinkens oan forstoarne kunstners) en in autobiografy, dêr't de titel noch net fan fêststiet.

Fierders hat ek Fedde Schurer plannen om samle wurk út to jaen.

It is allegear tige moai, mar foar Vestdijk, dy't yn Oktober 50 jier wurdt, wol hwat sneu. Hwant hwa útjower sil it oandoarre en jow dy syn ûntelbere wurken út?

FREARK DAM.